Зеленский Трамп билан гаплашиш учун Берлинга боради

north_east

Путин ва Трамп ҳарбий базада учрашади

Украина Президенти Владимир Зеленский бугун, 13 август куни Европа етакчиларининг АҚШ Президенти Дональд Трамп билан видеоконференция йиғилишида иштирок этиш учун Берлинга боради. Бу ҳақда ҳукуматдаги манбаларга таяниб, DPA агентлиги хабар берди.

Трампнинг Россия Президенти Владимир Путин билан Аляскадаги учрашуви олдидан ўтказилаётган суҳбат ташаббускори Германия канцлери Фридрих Мерц бўлган. Видеоконференцияда Зеленский, Трамп ва Мерцдан ташқари Буюк Британия, Италия, Польша, Финляндия ва Франция Президентлари ва ҳукумат раҳбарлари, Европа комиссияси раиси Урсула фон дер Ляйен, Европа Иттифоқи Кенгаши президенти Антониу Кошта, НАТО Бош котиби Марк Рютте ва АҚШ вице-президенти Жеймс Дэвид Вэнс иштирок этади.

“Иштирокчилар Россияга босим ўтказишнинг кейинги вариантларини муҳокама қилиш ниятида. Бундан ташқари, мумкин бўлган тинчлик музокараларига тайёргарлик кўриш ва у билан боғлиқ ҳудудий даъволар ва хавфсизлик масалалари муҳокама қилинади”, дейилади Германия ҳукумати хабарида.

“Bloomberg”нинг ёзишича, видеоконференция форматидаги музокаралар Берлин вақти билан соат 15:00 да (Тошкент вақти билан 18:00) бошланади.

АҚШ Президенти Дональд Трамп ва Россия Президенти Владимир Путиннинг Аляскадаги учрашуви 15 август куни Эльмендорф-Ричардсон ҳарбий базасида бўлиб ўтади. Оқ уй матбуот котиби Кэролайн Ливитт хабар беришича, Трамп ва Путин учрашувнинг камида бир қисмини ёлғиз ўзи, фақат таржимонлар иштирокида, маслаҳатчилар иштирокисиз ўтказади. Трампнинг ўзи учрашувни “синов” деб атади.

Саммит эълон қилингандан сўнг Европа етакчилари қўшма баёнот бериб, “дипломатик ечим Украина ва Европанинг ҳаётий хавфсизлик манфаатларини ҳимоя қилиши керак”лигини таъкидлади. Европа етакчилари “Украинада тинчликка эришиш йўлини Украина иштирокисиз белгилаб бўлмаслигини” билдирди.