Путин ва Трамп ҳарбий базада учрашади

north_east

Путин Аляскага борган биринчи Россия раҳбари бўлади

АҚШ Президенти Дональд Трамп ва Россия Президенти Владимир Путиннинг Аляскадаги учрашуви Эльмендорф-Ричардсон ҳарбий базасида бўлиб ўтади. Бу ҳақда кеча, 12 август куни манбаларига таяниб, CNN хабар берди.

Учрашувга тайёргарлик бошланганидан кўп ўтмай, ташкилотчилар Аляскадаги саммитни ўтказиш учун мос бўлган ягона шаҳар штатнинг энг йирик шаҳри Анкориж бўлади, деган хулосага келган. Гарчи Оқ уй Россия Президенти Америка ҳарбий объекти ҳудудига тушиб қоладиган вазиятдан қочишга умид қилган бўлсада, бу ерда фақат шаҳарнинг шимолий чеккасида жойлашган Эльмендорф-Ричардсон базаси хавфсизлик талабларига жавоб бера олади.

Телеканал суҳбатдошларининг таъкидлашича, учрашув ўтказиладиган жойни танлашда Европадаги вариантлар дарҳол рад этилган, чунки Гаагадаги Халқаро жиноий суд Путинни ҳибсга олиш учун ордер берган. Шу билан бирга, Венгрия варианти ҳам кўриб чиқилган, унинг Бош вазири Виктор Орбан ҳам Путинга, ҳам Трампга яқин.

Россия Президенти Бирлашган Араб Амирликларини саммит ўтказиш учун муносиб жой деб атаган бўлса-да, Оқ уй Трампнинг май ойидаги ташрифидан сўнг Яқин Шарққа яна узоқ сафардан қочишга умид қилган. Натижада, америкалик расмийлар Путин АҚШ ҳудудидаги учрашувга рози бўлганидан “ҳурсанд бўлган ва бироз ҳайратда қолган”.

Оқ уй матбуот котиби Кэролайн Ливиттга кўра, Трамп ва Путин учрашувнинг камида бир қисмини ёлғиз ўзи, фақат таржимонлар иштирокида, маслаҳатчилар иштирокисиз ўтказади. Трампнинг Путин билан аввалги икки учрашувида ҳам юқори мартабали ёрдамчилари муайян нуқталарда бўлмаган.

Одатда, бундай саммит олдидан кенг кўламли музокаралар ва бир неча ойлик тайёргарлик кўрилади, бу сафар бундай бўлмади. Трампнинг ўзи буни “синов” учрашуви деб билишини айтди. 

“Президент “мен бу йигит билан ўтиришим керак. Мен у билан шахсан учрашишим керак. Мен уни шахсан эшитишим керак. Мен унга қараб вазиятга баҳо беришим керак” деб ҳис қилмоқда”, деди АҚШ Давлат котиби Марко Рубио саммит ҳақида.

CNN хабарида қайд этилишича, Трампнинг махсус элчиси Стивен Уиткоффнинг Москвага ташриф буюрганидан кейин Путинни Трамп билан учрашишга нима сабаб бўлгани деярли номаълумлигича қолмоқда. Саммитдан икки кун олдин, яъни бугун, 13 август куни Европа етакчилари ва Украина Президенти Владимир Зеленский Трамп билан телефон орқали гаплашиб, Украинадаги урушни тугатиш йўлларини муҳокама қилиши кутилмоқда.