Зеленский Путинни Киевга таклиф қилди

Украина Президенти Владимир Зеленский Россия Президенти Владимир Путин билан Москвада  учрашув ўтказишнинг имконсизлигини айтиб, уни Киевга таклиф қилди. Президентнинг бу ҳақдаги сўзларини “Deutsche Welle” келтирди.

Зеленский агар бундай музокаралар урушни тезроқ тугатишга ёрдам берса, ҳар қандай усулдаги учрашувга рози эканини айтган. Шунингдек, у Россия ёки Беларусь ҳудудида учрашув ўтказиш мумкин эмаслигини, чунки Россия Украинага қарши уруш бошлаган давлат бўлса, Беларусь бу ҳаракатларга ёрдам бераётганини қўшимча қилган. 

“Бу худди Путинни Киевда кутиб олишдек гап. Мен уни Киевга таклиф қилишим мумкин. Агар журъат этса, албатта келсин”, деган Зеленский журналистлар билан мулоқотда.

Шунингдек, Америкалик расмийларнинг воситачилиги асосида Россия ва Украина ўртасидаги навбатдаги учрашув Абу-Дабида муваффақиятли якунланса, ундан кейин Россия ва Украина Президентлари саммити Москвада ёки Киевда ўтказилиши эҳтимоли бор.

Маълумот ўрнида, 2025 йилнинг сентябрь ойида Путин Хитойга ташрифи чоғида Зеленскийни Москвага таклиф қилган эди. Россия Президенти бу ташаббус АҚШ Президенти Дональд Трамп илтимосига биноан илгари сурилганини айтган.

“Агар Зеленский Москвага келишга тайёр бўлса, учрашув бўлади”, деган эди Путин.

Ўша пайтда Украина Президенти бу таклиф Кремль аслида учрашувни истамаётганининг белгиси бўлиши мумкинлигини билдирган. Бироқ, Россия томонининг музокаралар ҳақида гапира бошлагани ижобий аломат эканини ҳам айтиб ўтган.

Эслатиб ўтамиз, аввалроқ АҚШ воситачилигида Россия ва Украина делегациялари ўртасидаги навбатдаги музокаралар 1 февраль куни Абу-Дабида бўлиб ўтиши ҳақида хабар берилган эди.

Суннатова Фарангиз