Зеленский Оқ уйдаги жанжалдан 2 ой ўтиб Вэнс билан учрашди

north_east

Россия ва Украина Истанбулда нималарга келишиб олди?

Украина Президенти Владимир Зеленский кеча, 18 май куни Римда АҚШ вице-президенти Жеймс Дэвид Вэнс ва Давлат котиби Марко Рубио билан учрашди. Бу ҳақда у ўзининг Telegram-каналида  ёзди.

Учрашувда томонлар 15 май куни Истанбулдаги музокараларни муҳокама қилди ва Зеленский Украина “ҳақиқий дипломатия”га тайёр эканини тасдиқлади ва “энг тез тўлиқ ва сўзсиз ўт очишни тўхтатишга” чақирди.

“Шунингдек, биз Россияга қарши санкциялар, ўзаро савдо, мудофаа соҳасидаги ҳамкорлик, жанг майдонидаги вазият ва келажакда асирлар алмашинуви заруриятига тўхталдик”, деб тушунтирди давлат раҳбари.

Президент, шунингдек, Россия “урушни тўхтатишга тайёр бўлмагунча” унга босим ўтказишда давом этиш зарурлигини таъкидлади.

“Ва, албатта, биз адолатли ва барқарор тинчликка эришиш йўлидаги қўшма қадамларимизни муҳокама қилдик. Америка халқига сизнинг қўллаб-қувватлаганингиз ва ҳаётни сақлаб қолишдаги етакчилигингиз учун раҳмат”, дея хулоса қилди Владимир Зеленский.

АҚШ вице-президенти ҳам Зеленский билан музокаралардаги янгиликларни муҳокама қилганини билдирди.

“Бугун тушдан кейин Давлат котиби Рубио ва мен Президент Зеленский билан учрашдим. Мамлакатларимиз Украинадаги кераксиз қон тўкилишига барҳам бериш мақсадини бирлаштиради ва биз ўт очишни тўхтатиш ва мустаҳкам тинчлик учун давом этаётган музокаралар ҳақидаги янгиликларни муҳокама қилдик”, деб ёзди Вэнс X'даги саҳифасида.

Қайд этиш жоиз, бу Зеленский ва Вэнснинг 28 февраль кунги Оқ уйдаги жанжалдан кейинги биринчи учрашуви. Ижтимоий тармоқларда эълон қилинган суратлардан бу гал улар ортиқча жанжал ва шовқин-суронсиз суҳбатлашганини англаш мумкин. 

Эслатиб ўтамиз, Зеленский ҳам, Вэнс ҳам Ватиканда 267-чи Рим епископи Лео XIV хизматининг расмий бошланиши (тахтга ўтириши) муносабати билан бўлиб ўтган тантанали маросимда қатнашиш учун Римга келганди.