Зеленский Грецияда Урсула фон дер Ляйен билан учрашади

Украина Президенти Владимир Зеленский Грецияга етиб келди. Зеленский у ерда Европа комиссияси раҳбари Урсула фон дер Ляйен ва Ғарбий Болқон давлатлари етакчилари билан учрашади. Бу ҳақда у ўзининг ижтимоий тармоқдаги саҳифасида маълум қилди.

Зеленскийнинг ёзишича, у Греция Президенти Катерина Сакелларопулу ва Бош вазир Кириакос Мицотакис билан ҳам учрашади. 

Қайд этилишича, бугун, 21 август куни Греция Бош вазири ўз қароргоҳида Ғарбий Болқон мамлакатлари ва ЕИга аъзо давлатлар раҳбарлари билан Европа Иттифоқини кенгайтиришга бағишланган норасмий кечки овқатда учрашади. Учрашувда Сербия ва Черногория Президентлари Александр Вучич ва Яков Милатович, Шимолий Македония Бош вазири Димитар Ковачевский, (тан олинмаган) Косово бош вазири Альбин Курти, Босния ва Герцеговина ҳукумат раҳбари Боряна Кристо, Болгариядан Бош вазир Николай Денков, Хорватия Бош вазири Андрей Пленкович ва Руминия Бош вазири Марчел Чолаку иштирок этиши кутилмоқда. Таклифни Европа Комиссияси раҳбари Урсула фон дер Ляйен ва Европа Кенгаши раҳбари Шарль Мишель ҳам қабул қилган.

Эслатиб ўтамиз, олдинроқ Зеленский Швеция, Нидерландия ва Данияга борган ва давлатлар раҳбарияти билан учрашганди. Швецияда CV90 жанговар машинасини Украинада ишлаб чиқариш бўйича,  Нидерландия 42 та F-16 қирувчи самолётини, Данияда 19 та F-16 қирувчи самолётини Киевга топшириш бўйича келишувларга эришилди.