Зеленский АҚШнинг тинчлик режасини олди

Кеча, 20 ноябрь куни Украина Президенти Владимир Зеленский АҚШдан тинчлик режасини расмий равишда олди. Бу ҳақда Украина Президенти офиси хабар берди.

Зеленский идорасига кўра, Украина Президенти Америка томонидан “дипломатияни фаоллаштириши мумкин бўлган” режа лойиҳасини расмий равишда қабул қилган.

“Украина Президенти халқимиз учун муҳим бўлган асосий тамойилларни белгилаб берди ва бугунги учрашув якунларига кўра, режадаги бандлар устида шундай ишлашга келишиб олдик, бу урушнинг муносиб якунига олиб келиши керак.

Украина Россия босқини бошланган илк сонияларданоқ тинчликка интилиб келади ва ҳақиқий тинчликка яқинлаштира оладиган барча мазмунли таклифларни қўллаб-қувватлайди. Украина шу йил бошидан бошлаб қон тўкилишини тўхтатиш учун Президент Трампнинг таклифларини қўллаб келмоқда. Ҳозир ҳам Америка томони ва Европа ҳамда дунё бўйича ҳамкорларимиз билан конструктив ишлашга тайёрмиз”, дейилади хабарда.

Шунингдек, яқин кунларда Зеленский мавжуд дипломатик имкониятлар ва тинчлик учун зарур бўлган асосий бандларни Дональд Трамп билан муҳокама қилишни кутаётгани билдирилган.

Эслатиб ўтамиз, аввалроқ Украина бўйича Трампнинг 28 банддан иборат тинчлик режаси ҳақида хабар берилганди. У Украинанинг тинчлиги, хавфсизлик кафолатлари, Европадаги хавфсизлик ва АҚШнинг Украина ҳамда Россия билан келажакдаги муносабатларини ўз ичига олади.