АҚШ Украина бўйича режа ишлаб чиқмоқда – Оқ уй

АҚШ Россия ва Украина билан алоқада бўлиб, уларнинг иштирокида тинчлик режасини ишлаб чиқмоқда. Бу ҳақда кеча, 20 ноябрь куни Оқ уй матбуот котиби Кэролайн Ливитт журналистлар билан бўлиб ўтган учрашувда сўз очди.

“Махсус вакил Стив Уиткофф ва Давлат котиби Марко Рубио ўтган ой давомида режани ишлаб чиқиш устида бош қотирди. АҚШ вакиллари Россия ва Украина билан тенг даражада алоқада бўлиб, бу мамлакатлар узоқ муддатли ва барқарор тинчлик учун қайси шартларга рози бўлиши мумкинлигини тушунишга ҳаракат қилди”, деган Ливитт. 

Шу каби хабарлар тарқалиши фонида давлатлар ўртасидаги музокаралар ҳам давом этмоқда ва ҳозирча Оқ уй унинг тафсилотларини ошкор қилмаяпти. Президент Дональд Трамп ушбу ташаббусни қўллаб-қувватлайди, шартлар икки томон учун мақбул бўлиши таъкидланган. Ливиттнинг қўшимча қилишича, АҚШ Мудофаа вазирлиги вакили Даниел Дрисколл Украина Президенти Владимир Зеленский билан учрашган ва учрашув ижобий кайфиятда ўтган.

“Биз иккала томон билан ҳам бу урушни тугатиш борасида яхши муҳокамалар ўтказдик“, деган Ливитт.

Зеленский яқин кунларда Трамп билан тинчлик режасининг шартларини муҳокама қилишни режалаштирмоқда. “The Washington Post” маълумотларига кўра, АҚШнинг таклифлари Киев учун деярли таслим бўлиш билан тенг ва Зеленский уларни қабул қила олмайди.

АҚШ ва Европа Иттифоқи Украина тинчлик ташаббусини ишлаб чиқишда бевосита иштирок этмаган. Оқ уй Зеленский шартларни қабул қилишга мажбур бўлишини, фронтдаги вазият ва коррупция можаро туфайли уни тайёр ҳолатга келишини кутмоқда. АҚШ учун энг муҳим нарса Украина шартларни қабул қилишидир.

Эслатиб ўтамиз, аввалроқ АҚШ ва Россия Президентларининг махсус вакиллари Стив Уиткофф ва Кирилл Дмитриев иштирокида ишлаб чиқилган Украина учун янги тинчлик режасида Қўшма Штатлар Украинадан барча Луганск ва Донецк вилоятларини таслим қилишни ва армиясини ярмига қисқартиришни талаб қилаётгани ҳақида хабар берилганди. Бу ОАВ томонидан эълон қилинган маълумотлар бўлиб, расмий тасдиғини топмаган.