Запорожье АЭС устидан назорат бошқа давлатга ўтказилмайди – Россия

Россия Ташқи ишлар вазирлиги Россия томонидан босиб олинган Запорожье АЭС (ЗАЭС) устидан назорат Украина ёки бошқа давлатга ўтказилишини истисно қилди. Тегишли баёнот кеча, 25 март куни Россия ТИВ сайтида эълон қилинди. 

“ЗАЭС – Россиянинг ядровий иншоотидир. Станциянинг Россия атом саноатига қайтиши узоқ вақтдан бери халқаро ҳамжамият фақат тан олиши керак бўлган фактдир”, дея маълум қилди Россия ТИВ.

Россия Ташқи ишлар вазирлиги, шунингдек, “Запорожье АЭСининг бирон бир давлат билан биргаликда ишлаши” қабул қилиниши мумкин эмаслигини таъкидлади.

“Бу ҳолда ядро хавфсизлигини тўғри таъминлаш, шунингдек, ядровий зарар учун фуқаролик жавобгарлиги масалаларини тартибга солиш мумкин эмас. Жаҳон амалиётида бундай прецедентлар йўқ”, дейилади хабарда.

Маълумот учун, Запорижье АЭС Европадаги энг йирик электр станцияси бўлиб, у Энергодарда жойлашган. У 2022 йил март ойида Россия Федерацияси томонидан Украинага қарши бошланган уруш пайтида Россия қўшинлари томонидан босиб олинган.

Эслатиб ўтамиз, аввалроқ АҚШ Президенти Дональд Трамп хавфсизлик нуқтаи назаридан Украинадаги тўрт атом электр станцияси бошқарувини АҚШ ўз қўлига олиши мумкинлигини айтган эди. Вашингтоннинг фикрича, атом электр станциясини АҚШ мулкига ўтказиш Украина энергетика инфратузилмаси учун энг яхши ҳимоя бўлади.

Украина Президенти Владимир Зеленский эса Трамп билан 19 март куни бўлиб ўтган суҳбати чоғида “фақат Россия томонидан вақтинчалик босиб олинган битта станция ҳақида” гап кетганини таъкидлади.