Зангиотада “заправка” портлади. Жабрланганлар бор (видео)

Кеча, 16 июль куни Тошкент вилоятидаги автомобилларга пропан газ тўлдириш шохобчасида юз берган портлаш оқибатида уч киши жароҳатланди. Бу ҳақда Фавқулодда вазиятлар вазирлиги хабар берди.

Маълум қилинишича, соат 22:46 да Тошкент вилояти ФВББга, Зангиота туманидан ўтган М-39 автомобиль йўлида жойлашган автомобилларга пропан газ тўлдириш шохобчаси ҳудудида ўрнатилган пропан сақлаш сиғими ва пропан газ ташишга мўлжалланган махсус автомобильда чақнаш рўй берганлиги тўғрисида хабар келиб тушган.

Шунга кўра, қутқарув бўлинмалари айтилган манзилга тезкорлик билан етиб борган ва ёнғин бугун, 17 июль куни соат 00:04 да ўчирилган.

Дастлабки маълумотларга кўра, уч нафар фуқаро тан жароҳати олиб, тез тиббий ёрдам ходимлари томонидан биринчи тиббий ёрдам кўрсатиш учун шифохонага олиб кетилган. Ҳодисадан кейин мазкур жабрланганларнинг аҳволи тўғрисида ҳали маълумот берилмаган.

Эслатиб ўтамиз, аввалроқ Андижон вилоятининг Хонобод шаҳрида жойлашган автомобилларга газ тўлдириш компрессор шохобчасида ҳаво-газ аралашмасининг чақнаши содир бўлган эди.