Европанинг энг кекса эркаги вафот этди

Европанинг энг кекса эркаги Витантонио Ловалло 112 ёшида вафот этди. У Италия жанубидаги Авильяно коммунасига қарашли кичик Сарнелли қишлоғида яшаган. Бу ҳақда “Corriere della Sera” хабар берди.

Қайд этилишича, Ловалло 1914 йилда туғилган ва жорий йилнинг 25 март куни 112 ёшини нишонлаган. Ёшлигида у чўпон, сўнгра хачир ҳайдовчиси бўлиб ишлаган. Иккинчи жаҳон уруши даврида у ҳарбий хизматга чақирилган ва 1943 йилда Грецияда немис қўшинларига асирга тушган. Кейинчалик у Германиядаги концлагерга депортация қилинган ва у ердан 1945 йилнинг май ойида озод этилган.

Урушдан кейин Ловалло Италиянинг Базиликата вилоятига қайтган. Унинг уч нафар фарзанди – икки қиз ва бир ўғли бор. 

“Унинг соддалик, куч-ғайрат ҳамда оиласига ва ўз заминига бўлган муҳаббат билан кечирган узоқ умри қалбимизда абадий қолади”, дейди Авильяно мэри Жузеппе Мекка.

Шу билан бирга, расмий ҳужжатларда Ловаллонинг туғилган санаси 1914 йил 28 март деб кўрсатилган, оиласи эса унинг туғилган кунини 25 март деб ҳисоблайди. Бу фарқ ўша даврда чақалоқни рўйхатдан ўтказиш учун муниципалитетгача 20 километр атрофида масофани босиб ўтиш талаб этилгани билан изоҳланган. Ловаллонинг дафн маросими бугун, 17 сентябрь куни бўлиб ўтади.

Эндиликда Европанинг энг кекса эркаги 111 ёшли португалиялик Жоаким Варела бўлди. Шу билан бирга, қитъада ундан ёши каттароқ 31 нафар аёл яшамоқда. Улар орасидаги рекордчи 117 ёшли британлик Этель Катерхэм.

Эслатиб ўтамиз, аввалроқ Япониянинг тўрт императорини кўрган энг кекса эркаги Мизуно Киётака 111 ёшида вафот этган эди.