Yevropa liderlari Zelenskiy bilan Ukrainaning kelajagini muhokama qilmoqda

Bugun, 10 may kuni Ukraina poytaxti Kiyev shahrida Ukrainaning Rossiya bosqinidan himoyalanishda harbiy yordamni davom ettirishga tayyor bo‘lgan hamkorlari – “ko‘ngillilar koalitsiyasi” uchrashuvi bo‘lib o‘tmoqda. Bu haqda Ukraina Tashqi ishlar vazirligi xabar berdi.

Ma’lum qilinishicha, dastlab, Ukraina poytaxtiga yetib kelganidan so‘ng, Germaniya kansleri Fridrix Mers, Fransiya Prezidenti Emmanuel Makron, shuningdek, Buyuk Britaniya va Polsha Bosh vazirlari Kir Starmer va Donald Tusk Rossiya yurishi oqibatida halok bo‘lganlar xotirasiga hurmat bajo keltirgan.

Ukraina Prezidenti Vladimir Zelenskiy va birinchi xonim Yelena Zelenskaya bilan birgalikda va Ukraina faxriy qorovuli rotasi ishtirokida Yevropa davlatlari rahbarlari Mustaqillik maydonidagi vaqtinchalik yodgorlik yonida xotira shamlarini yoqqan va halok bo‘lganlar xotirasiga bir daqiqalik sukut bilan hurmat bajo keltirgan.

Shundan so‘ng, “ko‘ngillilar koalitsiyasi” uchrashuvi boshlangan, Mers Rossiya Ukrainada 30 kunlik o‘t ochishni to‘xtatish va tinchlik o‘rnatish bo‘yicha muzokaralardan bosh tortsa, buning oqibatlari bilan tahdid qilgan.

“O‘shanda sanksiyalarning keng ko‘lamli kuchaytirilishi va Ukrainaga yanada keng ko‘lamli yordam ko‘rsatiladi”, degan kansler.

Uning so‘zlariga ko‘ra, AQSH Prezidenti Donald Tramp Rossiya Prezidenti Vladimir Putinga nisbatan sabrsizlanmoqda.

“Kreml tezda uzoq muddatli o‘t ochishni to‘xtatish taklifiga javob berishi kerak”, deya qo‘shimcha qilgan Germaniya kansleri.

Tashrif Moskvadagi keng ko‘lamli harbiy paradda ishtirok etish uchun Rossiyaga o‘nlab davlatlar rahbarlari tashrif buyurganidan bir kun o‘tib bo‘lib o‘tmoqda.

Eslatib o‘tamiz, Germaniya kansleri Fridrix Mers, Fransiya Prezidenti Emmanuel Makron va Buyuk Britaniya Bosh vaziri Kir Starmer bugun, 10 may kuni ertalab Kiyevdagi asosiy temiryo‘l vokzaliga yetib borgani haqida xabar berilgan edi.