Еврокомиссия 150 млрд евролик мудофаа режасини тақдим этди

Бугун, 4 март куни Брюсселда Европа Комиссияси раҳбари Урсула фон дер Ляйен томонидан янги ReArm Europe мудофаа режаси тақдим этилди.

Унинг сўзларига кўра, бу режа Европа Иттифоқи ўз мудофааси ва хавфсизлиги учун масъулиятни ўз зиммасига олишга ва Украинага ёрдамни оширишга тайёрлигини кўрсатади.

“Биз қайта қуролланиш даврида яшаяпмиз. Ва Европа ўзининг мудофаа харажатларини сезиларли даражада оширишга тайёр – шошилинч ҳаракат қилиш ва Украинани қўллаб-қувватлаш зарурлигига жавоб бериш, шунингдек, ўзимизнинг Европа хавфсизлигимиз учун катта масъулиятни ўз зиммасига олишга тайёр”, деди Еврокомиссия раҳбари. 

Унинг режаси бешта устунни ўз ичига олади, улардан бири Европа Иттифоқи мамлакатлари учун ҳаво ва ракетага қарши мудофаа, артиллерия тизимлари, ракеталар ва ўқ-дорилар, дрон ва учувчисиз мудофаа тизимлари ва кибердан тортиб ҳарбий ҳаракатчанликкача бўлган бошқа эҳтиёжлар каби мудофаага сармоя киритиш учун янги 150 миллиард евролик кредит жамғармасидир.

Фон дер Ляйеннинг сўзларига кўра, янги жамғарма орқали ЕИ давлатлари қўшма харидларни амалга ошириши ва ҳарбий техникани шошилинч етказиб бериш орқали Украинага кўмакни сезиларли даражада ошириши мумкин бўлади.

“Қўшма харидларга бундай ёндашув, шунингдек, харажатларни камайтиради, парчаланишни камайтиради, ўзаро ҳамкорликни яхшилайди ва мудофаа саноат базамизни мустаҳкамлайди”, деди Еврокомиссия раҳбари.

Европа Комиссияси, умуман олганда, турли молиявий воситалардан фойдаланган ҳолда, ReArm Europe дастури Европанинг хавфсизлиги ва барқарорлигини таъминлаш учун тахминан 800 миллиард еврони сафарбар қилишга қодир, деб ҳисоблайди.

Фон дер Ляйен 6 март куни Украинани қўллаб-қувватлаш бўйича махсус саммит олдидан Европа Иттифоқи раҳбарларига таклиф билан хат йўллади. Еврокомиссия раҳбари нутқидан бир неча соат олдин АҚШ Президенти Дональд Трамп Украинага номаълум муддатга барча ҳарбий ёрдам етказиб бериш тўхтатилишини эълон қилди.