Ерда сўнгги уч ойдаги энг кучли магнит бўрони қайд этилди

Ерда G3’га яқин даражадаги кучли магнит бўрони кузатилмоқда. Бу ҳақда бугун, 15 сентябрь куни Қуёш астрономияси лабораторияси хабар берди.

Воқеа сайёранинг 15 сентябрга ўтар кечаси чегарасини кесиб ўтган катта коронал тешиги зонасига кириши билан боғлиқ.

Мутахассисларнинг фикрича, геомагнит фаолликнинг ошиши кутилмаган ҳодиса бўлган. Илгари G1’дан юқори бўлмаган даражадаги заиф бузилишлар башорат қилинган, аммо ҳақиқий интенсивлик анча юқори бўлиб чиқди. Охирги марта шу йилнинг 1-2 июнь кунлари, яъни уч ойдан кўпроқ вақт олдин худди шундай кучли бўрон қайд этилган.

Геомагнит вазиятнинг умумий ёмонлашуви 4-6 кун давом этиши кутилмоқда. Ерга яқин космосдаги вазиятни тўлиқ нормаллаштириш жорий ҳафта охиридан олдин бўлиши мумкин.

Шу билан бирга, экспертларнинг таъкидлашича, коронал тешикларининг таъсири беқарор: бўрон бир неча соат давом этадиган алоҳида портлашлар шаклида ривожланади, улар орасида фаолликнинг вақтинча заифлашиши қайд этилади.

Дастлабки ҳисоб-китобларга кўра, жорий маҳаллий ўсиш яқин 6-9 соат ичида тугаши мумкин. Бироқ, экспертларнинг таъкидлашича, воқеалар ривожини олдиндан айтиб бўлмайди ва прогнозлардан четга чиқиши мумкин.

Эслатиб ўтамиз, аввалроқ ўтган ҳафта охиридан бошлаб Ер Қуёшдаги йирик коронал тешикдан чиқаётган Қуёш шамоли оқимига кириши хабар қилинганди. Геомагнит безовталиклар олти кунгача чўзилиши мумкинлиги, унинг энг юқори нуқтаси 14-16 сентябрь кунларига тўғри келиши айтилганди.