ЕИ Трампнинг Россияга муносабатидан шубҳаланмоқда – ОАВ

АҚШ расмийлари ва Европа Иттифоқи етакчилари Президент Дональд Трампнинг Россияга тинчлик бўйича музокаралар учун ажратилган муддатни қисқартириш қарорига шубҳа билан қарамоқда. Бу ҳақда ўз манбаларига таяниб, “The Wall Street Journal” хабар берди.

Нашр манбаларига кўра, Европа Трамп Россиянинг “можарони ҳал қила олмагани” учун унга жиддий санкциялар қўллаш бўйича амалда ҳеч қандай муҳим қадам ташламаган, деб ҳисобламоқда. Яъни, Трампнинг жорий этаётган божларини Европа катта юриш сифатида баҳоламаяпти. 

АҚШ Давлат департаментининг собиқ ходими Эдвард Фишманнинг айтишича, “аслида 20 январдан бери Россияга қарши бирорта ҳам янги санкция пакети жорий қилинмаган”, аксинча, Трамп ҳокимиятга келгач, амалдаги чекловлар ҳам юмшатилган.

Трамп маъмуриятидаги айрим мансабдорлар нашр билан суҳбатда Президент энди Владимир Путин билан шахсий алоқаларига суяниб, Россия ва Украина ўртасида тинчлик шартномаси тузишига ишонмаётганини айтган. Уларнинг қўшимча қилишича, шунинг учун ҳам Трамп босим сиёсатини танлаган. 

Эслатиб ўтамиз, 29 июль куни Трамп Россияга Украина билан сулҳга эришиш учун 10 кун муддат берган эди. Бу муддат 8 августда тугайди. Бунгача 50 кунлик муҳлат белгилаган эди. Кремль эса Трампнинг навбатдаги баёнотларини “эътиборга олди” ва Россия санкцияларга нисбатан “муайян иммунитетга” эга эканини маълум қилди.