ЕИ Россия газидан тезроқ воз кечмоқчи

Европа Иттифоқи Россия газидан воз кечиш муддатини кўчириб, буни 2027 йил январь ойигача амалга оширишни режалаштирмоқда. Буни бугун, 16 октябрь куни Европарламентнинг энергетика бўйича қўмитаси қўллаб-қувватлади.

“Reuters”нинг ёзишича, жорий йилнинг июнь ойида Европа комиссияси дастлаб Россиядан табиий ва суюлтирилган газни импорт қилишни 2027 йилнинг охиригача тақиқлаш бўйича ҳуқуқий мажбурий қарор жорий этишни таклиф қилган. Бироқ етакчи парламент аъзолари мазкур якуний муддатни 2027 йилнинг 1 январига кўчиришни таклиф қилган. Натижада Европарламентнинг энергетика бўйича қўмитаси бугун, 16 октябрь куни Россия газидан босқичма-босқич воз кечишни бир йилга тезлаштириш таклифини қўллаб-қувватлаган.

Маълумотларга кўра, 2025 йилнинг бошидан бери Россиянинг Европа Иттифоқи мамлакатларига суюлтирилган табиий газ етказиб бериш ҳажми ўтган йилнинг шу даврига нисбатан 7 фоизга камайиб, тахминан 15 миллиард куб метрга яқинлашган.

ЕИнинг Россиядан суюлтирилган табиий газ импорти жорий йилнинг январь-сентябрь ойларида 15 миллиард куб метрни ташкил этди, бу 2024 йилдаги 16,1 миллиард куб метрга нисбатан кам.

Эслатиб ўтамиз, аввалроқ ЕИнинг 7 давлати Россиядан энергия ресурслари импортини оширгани ҳақида хабар берилганди. 2022 йилдан буён Европанинг Россия энергия таъминотига қарамлиги 90 фоизга камайганига қарамай, 2025 йилнинг дастлабки саккиз ойида Европа Иттифоқи Россиядан 11 миллиард евродан ортиқ миқдорда энергия ресурсларини импорт қилган.

Моҳичеҳра Қадамова