Японияда цунами хавфи эълон қилинди

Бугун, 20 апрель куни Япония шимолининг шарқий соҳилида яшовчи аҳоли зилзиладан кейин юзага келиши мумкин бўлган цунами ҳақида огоҳлантирилди. Бу ҳақдаги хабарни Япония миллий метеорология бошқармаси тарқатди.

Қайд этилишича, Хонсю оролининг шимолий чеккасида жойлашган Аомори префектурасида 7,5 магнитудали зилзила содир бўлган. Баландлиги уч метргача бўлган илк тўлқинлар яқин вақт ичида қирғоқларга етиб бориши мумкин. Иватэ, Аомори, Мияги префектуралари, шунингдек, Хоккайдо оролининг жануби алоҳида хавф остидаги ҳудудлар сифатида белгиланган. 

Маълумот учун, жорий йилнинг 18 апрель куни ҳам Япониянинг Нагано префектурасида 5,0 магнитудали зилзила юз берган. Ерости силкинишларининг максимал кучи Японияда қабул қилинган етти баллик шкала бўйича 5+ ни ташкил этган. Зилзила ўчоғи 10 километр чуқурликда жойлашган. Ҳеч ким жабрланмаган, вайронагарчиликлар қайд этилмаган.

Бундан олдин UNESCO яқин ўн йилликларда Ўрта Ер денгизида, жумладан, Франция соҳилларида цунами юз бериш эҳтимоли юқори эканидан огоҳлантирган. Мутахассисларнинг фикрича, бу минтақани бутунлай хавфсиз деб ҳисоблаб бўлмайди: тарихий маълумотлар вайронкор тўлқинлар Франция қирғоқларига етиб борган ҳолатлардан далолат беради. Хавф нафақат тўлқинларнинг ўзида, балки портларни сув остида қолдириш ва соҳил бўйи инфратузилмасини вайрон қилишга қодир бўлган кучли оқимларда ҳамдир.