Япония 5-марта ЖЧ плей-офф босқичида ўйнайди

Бугун, 26 июнь куни Япония терма жамоаси Жаҳон чемпионати гуруҳ босқичининг сўнгги, учинчи турида Швеция билан 1:1 ҳисобида дуранг ўйнади. Шу тариқа, японлар ўз тарихида бешинчи бор мундиаль плей-офф босқичида иштирок этиш имкониятига эга бўлди.

“Ф” гуруҳининг иккинчи учрашувида Нидерландия Тунисни 3:1 ҳисобида мағлуб этди. Учрашув АҚШнинг Миссури штатидаги Канзас-Сити шаҳрида бўлиб ўтди. Баҳснинг 3-дақиқасида Тунис терма жамоаси аъзоси Эльес Схири автоголга муаллифлик қилди. Орадан тўрт дақиқа ўтиб, Брайан Бробби Нидерландиянинг иккинчи голини киритди. 62-дақиқада Ян Паул ван Хекке ҳисобни йириклаштирди. Тунис сафида Ҳазем Мастури гол урди.

Ўйинда киритилган голларни ушбу ҳавола орқали томоша қилишингиз мумкин.

Гуруҳ баҳслари якунларига кўра, Нидерландия 7 очко билан биринчи ўринни эгаллади. Япония 5 очко билан иккинчи, Швеция 4 очко билан учинчи, Тунис эса 0 очко билан сўнгги ўриндан жой олди.

Нидерландия, Япония ва Швеция плей-офф босқичига йўлланма олди. Нидерландия 1/16 финалда Марокашга қарши майдонга тушади. Ушбу учрашув жорий йилнинг 30 июнь куни Мексиканинг Монтеррей шаҳрида бўлиб ўтади.

Япония 29 июнь куни АҚШнинг Техас штати, Хьюстон шаҳрида Бразилияга қарши баҳс олиб боради. Швециянинг кейинги босқичдаги рақиби кейинроқ маълум бўлади.