Виндзорлар синовда: қироллик осмонида қора булутлар тўпланди

Қирол Чарльз III нинг укаси Эндрю Маунтбеттен-Виндзор полиция томонидан қўлга олинган. Икки қироллик мулкида тинтув ўтказилган. Матбуот эса Жеффри Эпштейн билан боғлиқ можарони Букенгем саройи билан боғламоқда. Кўриниб турибдики, Британия монархияси сўнгги йиллардаги энг оғир инқирозга юз тутган. Бу ҳақда APP ёзди.

Шунга қарамай, сарой расмий вазифаларни тўхтатмаган: қирол Лондон мода ҳафталигида, қиролича Камилла концертда, принцесса Анна эса қамоқхона ташрифида бўлган. Бу фақат “британияча сокинлик” эмас, балки Виндзор уйининг омон қолиш учун биринчи ҳаракати сифатида баҳоланмоқда.

Эндрю Маунтбеттен-Виндзор 11 соатлик сўроқдан сўнг айб қўйилмасдан қўйиб юборилган. Аммо унинг Эпштейн билан алоқаларига доир АҚШ Адлия вазирлиги очган ҳужжатлар янги саволларни туғдирган. Камида саккизта Британия полиция идораси ишни ўрганмоқда.
Кузатувчилар бу ҳолатни 1936 йилда Эдвард VIII нинг тахтдан воз кечиши билан таққосламоқда — ўшанда ҳам монархия нуфузи жиддий шикастланган эди. Бироқ бу сафар “оддий ечим” йўқ: Эдвард тахтдан тушган эди, ҳозир эса тергов давом этмоқда ва охири кўринмаяпти.

Сарой Эндрюни унвонлардан маҳрум қилган, ҳатто уни мерос тартибидан чиқариш масаласи кўриб чиқилмоқда. Экспертлар фикрича, замонавий медиа муҳити ва жамоатчиликнинг шаффофликка бўлган талаби монархия учун янги босим яратмоқда. Энди қирол нафақат рамзий раҳбар, балки жавобгарлик кутиладиган шахс сифатида кўрилмоқда.

Хуллас, энг яхши сценарий – тергов фақат Эндрю билан чекланиши. Энг ёмони эса чуқурроқ саволлар бутун жорий тизимга ёғдирилиши. Виндзорлар учун бу оддий можаро эмас. Бу – ишонч, легитимлик ва келажак учун кураш.

Эслатиб ўтамиз, аввалроқ АҚШ Бош прокурори Пэм Бонди Жеффри Эпштейн ишига доир ҳужжатларда тилга олинган 300 нафар машҳур шахс ва сиёсатчи исмидан иборат рўйхатни эълон қилган эди.