Venesueladagi zilzila qurbonlari soni 600 nafarga yaqinlashdi

Venesueladagi vayronkor zilzila qurbonlari soni 500 nafardan oshdi. Bu haqda mamlakat prezidenti vazifasini bajaruvchi Delsi Rodrigesga tayanib, BBC xabar berdi.

Delsi Rodrigesning so‘zlariga ko‘ra, ayni paytga kelib 589 kishi vafot etgan, jarohatlanganlar soni esa 2 980 kishini tashkil etmoqda. 

Milliy assambleya spikeri Xorxe Rodrigesning ma’lum qilishicha, zilzila oqibatida 8 ta shifoxona, 20 ta savdo markazi va 68 ta infratuzilma ob’ekti shikastlangan. 250 ta bino zarar ko‘rgan yoki butunlay vayron bo‘lgan.

Bir qator mamlakatlar Venesuelaga qutqaruvchilar va gumanitar yordam jo‘natdi. AQSH logistik ko‘mak ko‘rsatish uchun harbiy bo‘linmalarini safarbar qildi. Braziliya 36 nafar mutaxassis va dala shifoxonasi bo‘lgan harbiy-transport samolyotini jo‘natmoqda. Ekvador, Salvador, Meksika, Chili, Kolumbiya, Kuba va boshqa davlatlar ham yordam berishga tayyor ekanliklarini bildirgan.

Eslatib o‘tamiz, kecha, 25 iyun kuni kunduzi Venesuelada 39 soniyalik farq bilan ikkita zilzila sodir bo‘lgandi: birinchi silkinish San-Felipe yaqinida 7,2 magnitudali, undan keyingi asosiysi esa Yumaredan janubi-sharqda 7,5 magnitudali bo‘ldi. Seysmologlar kamida 138 ta aftershokni (qayta yer silkinishini) qayd etdi.