Венесуэлада зилзила қурбонлари сони қарийб 1500 нафарга етди

Венесуэлада ҳафта ўртасида содир бўлган икки кучли зилзила оқибатида ҳалок бўлганлар сони қарийб 1500 нафарга етди. Бу ҳақда “Reuters” бугун, 29 июнь куни хабар қилди.

Маълум қилинишича, 24 июнь куни юз берган икки кучли зилзиладан энг кўп зарар кўрган Ла-Гуайра штатига хорижий қутқарув гуруҳлари етиб борган. Узоқ йиллардан буён сиёсий ва иқтисодий инқирозни бошдан кечираётган мамлакатда ўнлаб бинолар қум ва вайроналарга айланиб кетган. Вақтинчалик Президент Делси Родригес қутқарув ишлари тўхтатилмаслигини маълум қилган.

“Қутқарув ва тиклаш ишлари давом этмоқда. Бугун ҳам тирик қолган одамлар қутқарилди. Шунинг учун операциялар тўхтатилмайди. Биз ҳар доим умидни сақлаб қоламиз”, деган у.

Родригес, шунингдек, биноларнинг яшаш учун яроқлилигини баҳолайдиган президент комиссияси ташкил этилганини билдирган. Унинг айтишича, мактабларда дарслар яна бир ҳафтага тўхтатилган, Ла-Гуайрада эса электр таъминотининг 75 фоизи қайта тикланган.

Миллий ассамблея президенти Хорхе Родригеснинг маълум қилишича, 28 июнь куни қурбонлар сони яна 20 нафарга ошиб, 1450 нафарга етган. Унинг сўзларига кўра, 3150 нафар киши жароҳат олган, 12 721 нафар аҳоли бошпанасиз қолган, 774 та бино эса қулаб тушган.

“Биз ҳаётларни сақлаб қолиш ва уйидан айрилган одамлар учун вақтинчалик лагерлар ташкил этиш борасида ҳал қилувчи босқичдамиз”, деган у.

Қайд этилишича, хориждан 2600 нафардан зиёд қутқарувчи келгунига қадар маҳаллий аҳоли ва кўнгиллилар бир неча кун давомида вайроналар орасидан тирик қолганлар ва ҳалок бўлганларни қидирган. Улар оғир техниканинг етишмаслиги ҳамда расмий хизматларнинг чекланган иштирокидан шикоят қилган.

Ҳукумат маълумотига кўра, ҳафта охирига қадар камида 33 нафар одам, жумладан бир нечта бола тирик ҳолда қутқарилган. Бироқ ўн минглаб одамларнинг тақдири ҳануз номаълум. Мухолифат қўллаб-қувватлаётган махсус интернет платформасида 28 июнь куни қарийб 50 минг киши бедарак йўқолганлар рўйхатида қайд этилган. Бир кун аввал бу кўрсаткич 55 минг нафарни ташкил этган.

Эслатиб ўтамиз, аввалроқ Венесуэлада содир бўлган зилзила қурбонлари сони 1 минг 400 нафарга етгани, 3 мингдан ортиқ киши жароҳатлангани хабар қилинган эди.