Велосипедда Маккага кетаётган ўзбекистонлик Қозоғистонда адашиб қолди

Бугун, 13 май куни Маккага ҳаж сафари учун кетаётган ўзбекистонлик эркак Қозоғистоннинг Манғистов вилоятида адашиб қолди. Унга маҳаллий полиция ходимлари ёрдам берган. Бу ҳақда Қозоғистон Ички ишлар вазирлиги хабар берди.

Вазирлик маълумотига кўра, хизмат сафари чоғида адлия майори Индира Наримбетова ва адлия кичик лейтенанти Марат Озганов йўл четида ёрдамга муҳтож, чарчаган ва довдираб турган эркакни пайқаб қолган.

Аниқланишича, эркак ҳаж ибодатини адо этиш учун Ўзбекистондан велосипедда Саудия Арабистонига йўл олган. У жорий йилнинг 3 май куни Бухородан йўлга чиққан, минглаб километр босиб ўтган ва Манғистовга етиб борган. Ўша ерда йўлидан адашиб, қаердалигини билмай қолган.

Индира Наримбетова ва Марат Озганов унга навигация иловаларини ўрнатишга ёрдам берган, йўлни тушунтирган ҳамда хавфсиз ҳаракатланиш бўйича маслаҳатлар берган. Полиция ходимлари, шунингдек, йўл харажатлари учун молиявий ёрдам кўрсатганини ҳам билдирган. Эркакнинг ўзи эса ходимларга меҳрибонлик ва чин дилдан кўрсатган ёрдами учун миннатдорлик билдирган.

Қайд этиш жоиз, Саудия Арабистони рухсатномасиз ҳаж амалини адо этганлар ва бунга ёрдамлашганларга жарима ва депортация каби чораларни қўллайди. Хусусан, рухсатномасиз ҳаж ибодатини адо этаётган ёки адо этишга уринаётган шахсларга 20 минг Саудия риалигача (5,3 минг доллар) миқдорида жарима солинади. Маълум муддат давомида Макка шаҳри ва муқаддас жойларга киришга ёки у ерда қолишга уринган барча турдаги ташриф визаларининг эгаларига ҳам худди шундай жазо қўлланилади.

Эслатиб ўтамиз, аввалроқ муборак ҳаж сафарини ният қилган ўзбекистонликларнинг дастлабки гуруҳи муқаддас замин томон йўлга чиққани хабар қилинганди. Бўлғуси ҳожиларни кузатиш учун Ўзбекистон мусулмонлари идораси раиси, муфтий Шайх Нуриддин Холиқназар, Дин ишлари бўйича қўмита раиси Содиқжон Тошбоев, шунингдек, таниқли уламолар, имом-домлалар, мутасаддилар ва ОАВ вакиллари Тошкент халқаро аэропортида жам бўлганди.