Ўзбекистоннинг январь ойидаги йиғинига жалб этилган футболчилари эълон қилинди

Жаҳон чемпионатига тайёргарлик кўриш мақсадида Фабио Каннаваро бошчилигидаги Ўзбекистон миллий терма жамоаси жорий йилнинг январь ойида Бирлашган Араб Амирликларида ўқув-машғулот йиғини ўтказади. Ушбу халқаро тайёргарлик учун жалб этилган футболчилар рўйхати эълон қилинди. Бу ҳақда Ўзбекистон футбол ассоциацияси матбуот хизмати хабар берди.

Маълум қилинишича, ушбу рўйхатга Ўзбекистон Суперлигасида тўп сураётган футболчилардан 3 нафар дарвозабон, 9 нафар ҳимоячи, 9 нафар ярим ҳимоячи ва 9 нафар ҳужумчи жалб қилинган.

Манбага кўра, мураббийлар штаби қарорига асосан мазкур ўқув-машғулот йиғини БАА ҳудудида ўтказилиши белгиланган. Айни пайтда халқаро танаффус мавжуд эмаслиги ҳамда кўплаб мамлакатларда ички чемпионатлар давом этаётгани сабабли, жамоага асосан маҳаллий чемпионатда иштирок этаётган, миллий терма жамоага номзод футболчилар жалб қилинган. Ушбу йиғин давомида мураббийлар штаби футболчиларнинг жисмоний ҳолатини баҳолаш ва назорат қилишни режалаштирган.

Эслатиб ўтамиз, аввалроқ Ўзбекистон миллий терма жамоаси жорий йилнинг май ойида Суперлиганинг етакчи клубларига қарши ўртоқлик ўйинларида иштирок этиши ҳақида хабар берилган эди.