Ўзбекистонлик пара спортчилар яна 4 та олтин медалга эга чиқди 

Хитойнинг Ханчжоу шаҳрида бўлиб ўтаётган VI ёзги Пара Осиё ўйинларида Ўзбекистон делегацияси бугунги куннинг иккинчи ярмида 4 та олтин ва 4 та бронза медалини қўлга киритди. Бу ҳақда QALAMPIR.UZ мухбири Шахзод Шукуров хабар берди.

Унинг маълум қилишича, ҳозирда делегация ҳисобида жами 55 та медаль (17 та олтин, 17 та кумуш, 21 та бронза) бор. Ўзбекистон бу орқали медаллар жамғариш бўйича умумий рейтингнинг 5-поғонасини эгаллаб турибди.

•  Пара енгил атлетиканинг эркаклар ўртасида F63 классида ядро улоқтириш баҳсларида қатнашган Ўзбекистон вакили Муҳаммад Рихсимов 14.52 метр натижа билан олтин медалга сазовор бўлди.

•  Пара енгил атлетиканинг аёллар ўртасида Т11 классида узунликка сакраш баҳсларида мамлакат шарафини ҳимоя қилган Асила Мирзаёрова мусобақанинг олтин медалига эга чиқди.

•  Пара енгил атлетика бўйича аёллар ўртасида 57 классида диск улоқтириш баҳсларида иштирок этган Моҳигул Ҳамдамова барча рақибларини ортда қолдирган ҳолда олтин медалини қўлга киритди.

•  Пара таэквондо бўйича аёллар ўртасида +65 кг вазн тоифасида иштирок этган Гулжаной Наимова барча рақибларини мағлуб этган ҳолда мусобақа олтин медалига сазовор бўлди.

•  Пара таэквондо бўйича эркаклар ўртасида -80 кг вазн тоифасида Ўзбекистон вакили Асад Тоштемиров делегация ҳисобига навбатдаги бронза медални қўшиб қўйди.

•  Пара енгил атлетиканинг эркаклар ўртасида F35 классида ядро улоқтириш баҳсларида иштирок этган Хусниддин Норбеков 15.90 метр натижа билан бронза медалини қўлга киритди.

•  Яна бир Ўзбекистонлик пара енгил атлетикачи Ёқутхон Холбекова узунликка сакраш баҳсларида иштирок этди ва бронза медалига эга чиқди.

•  Сузиш бўйича эркаклар ўртасида S8 классида 100 метрга баттерфляй усулида сузиш бўйича ўтказилган баҳсларда қатнашган Азизбек Бойназаров 1:09:03 дақиқа натижа билан маррага учинчи бўлиб етиб келди ва бронза медалига сазовор бўлди.

Эслатиб ўтамиз, Ўзбекистон делегацияси бугунги куннинг биринчи ярмида мамлакат ҳисобига 1 та олтин, 4 та кумуш ва 3 та бронза медалларини қўлга киритган эди.