Ўзбекистонлик футболчи БАА клуби билан шартнома имзолади

Футбол бўйича Ўзбекистон миллий терма жамоаси аъзоси ва ОКМК клуби ҳимоячиси Абдулла Абдуллаев Бирлашган Араб Амирликларининг “Хорфаккан” клубига трансфер қилинди. Бу ҳақда Олмалиқ клуби матбуот хизмати хабар берди. 

“Жамоамиз ўз тарихида илк бор хориж клубига ўз футболчисини трансфер қилди. Узоқ давом этган музокаралардан сўнг ОКМК ва “Хорфаккан” футбол клублари ўртасида, шунингдек футболчининг розилиги асосида трансфер шартномаси имзоланиб, Абдулла Абдуллаев БАА клубига кўчиб ўтди. Абдуллаевга жамоамиз муваффақиятларига қўшган ҳиссаси учун миннатдорчилик билдириб, унинг кейинги фаолиятига омад ва зафарлар тилаймиз!” дейилади хабарда.

Тошкент вилояти клуби трансфер шартларини очиқламаган, бироқ мазкур хабар фонида Абдуллаевнинг “Transfermarkt” порталидаги маълумотлари ўзгартирилди. Унда футболчининг янги жамоаси асосий фонга чиққан, аммо шартнома муддати ва трансфер қийматига ойдинлик киритилмаган. 

ОАВга кўра, БАА клуби футболчи учун 200 минг доллар тўлаган, бу эса ҳимоячининг “Transfermarkt”даги нархидан анча кам. Абдулла Абдуллаевнинг порталда белгиланган тахминий нархи 641 минг доллар(600 минг евро) ни ташкил қилади.