Ўзбекистонга олиб кирилаётган картошка чегарада чириб қолди
Жамият
−
30 Январь
10117Қозоғистоннинг Павлодар шаҳридан келаётган картошка ортилган вагон текширув ишлари юзасидан Ўзбекистон билан чегарада 10 кун ушлаб қолингани оқибатида чирий бошлагани аниқланди. Бу ҳақда KTK хабар берди.
Манбага кўра, “Сариёғоч” станциясида картошка юкланган 43 та вагон тўхтатилган. Январь ойида тадбиркорлар уни Ўзбекистонга сотишган ва юк харидорга жўнатилган. Чегарада у фитосанитария текшируви учун тўхтатилган ва сабзавот 10 кундан кўпроқ вақт давомида вагонда қолиб кетган. Бунинг оқибатида картошка дастлаб музлаган, кейин эса эриган ва чирий бошлаган.
Тадбиркорлардан бири Нурсултон Орманов 43 та вагондан 3 таси унга тегишли экани ва чириган картошка сабаб 60 миллион тенге (тахминан 1 миллиард 503 миллион сўм) йўқотганини, ҳужжатлар январь ойининг ўрталарида – экспорт тақиқланишидан олдин расмийлаштирилганини таъкидлаган.
"Бир вагонда 68 тонна бор. Аммо ундан энди фойдаланиб бўлмайди! Бундай картошкани ҳайвонларга озуқа сифатида ҳам ишлатиб бўлмайди", дейди яна бир тадбиркор Азамат Серикбоев.
Қозоғистон Қишлоқ хўжалиги вазирлиги эса юклар ортилган вагонлар зарур кўрикдан ўтганини ва уларнинг йўлида давом этиши учун ҳеч қандай тўсиқ топмаганини таъкидламоқда.
"Бугунги кунга келиб, менинг маълумотларимга кўра, текшириш ишлари якунланган. Керакли маълумотлар аниқланди. Ҳозирда вагонларнинг кейинги ҳаракати учун ҳеч қандай тўсиқ йўқ. Шу боис экспортга мўлжалланган 43 та вагон чегарадан ўтиши мумкин", дейди Қозоғистон Республикаси қишлоқ хўжалиги вазири ўринбосари Ербол Тасжуреков
Бироқ, тадбиркорлар энди бундай кечиккан рухсатномага муҳтож эмас. Зарар кўраётган бешта компания вакиллари мансабдор шахсларни судга бериш ниятида эканини айтмоқда.
Эслатиб ўтамиз, 2025 йил 28 январдан бошлаб Қозоғистон ҳудудидан учинчи давлатларга картошка олиб чиқишга тақиқ жорий этилганди. Чеклов Евросиё иқтисодий иттифоқи (ЕОИИ) давлатларига татбиқ этилмайди, яъни ушбу мамлакатларга экспорт давом этади. Қарор 2025 йил 18 январь куни қабул қилинган бўлиб, уни Қишлоқ хўжалиги вазири 27 январь куни имзолаган. Чекловлар олти ой давомида амал қилади. Ўзбекистон Иқтисодиёт ва молия вазирлиги 2025 йил январь ойи бошидан 20 январга қадар картошканинг улгуржи нархлари 12,9 фоизга қимматлаганини маълум қилди.
Сара Комилжонова
LiveБарчаси