Ўзбекистонда тадбиркорлар 3 ой лицензиясиз ишлаши мумкин бўлади

Ўзбекистонда тадбиркорлар айрим фаолият турларини лицензия ёки рухсатнома олмасдан туриб 3 ой давомида амалга ошириши мумкин бўлади. Бу ҳақда Президент кеча, 13 август куни имзолаган “Ўзбекистон Республикасининг айрим қонун ҳужжатларига тадбиркорлик фаолияти эркинлигининг кафолатларини мустаҳкамлашга ҳамда тадбиркорлик субъектларини қўллаб-қувватлаш механизмларини такомиллаштиришга қаратилган қўшимча ва ўзгартиришлар киритиш тўғрисида”ги қонунда сўз боради.

Қонунга кўра, лицензия ёки рухсат этиш хусусиятига эга ҳужжатларни “Бизнесга лицензиясиз кириш” махсус режими доирасида олиш тартиби белгиланган. Унга мувофиқ талабгор махсус электрон тизим ёки Ягона интерактив давлат хизматлари портали (ЯИДХП) орқали ваколатли органни бепул хабардор қилган ҳолда фаолиятини лицензия ёки рухсатнома олмасдан бошлаши мумкин.

Мазкур режимнинг амал қилиш муддати 3 ой этиб белгиланган. Шу давр ичида тадбиркор лицензия ёки рухсат этувчи ҳужжатсиз фаолият юритгани учун жавобгарликка тортилмайди.

Қайд этилишича, тадбиркор ушбу муддат давомида ўз фаолиятини лицензия ва рухсат бериш талабларига мослаштириши, сўнгра тегишли ҳужжатларни расмийлаштириши ёки фаолиятини тўхтатиши керак бўлади.

Эслатиб ўтамиз, аввалроқ Ўзбекистонда ишлаб чиқарувчи ва экспортчилар учун тўлов ҳамда йиғимлар кескин камайтирилиши ҳақида хабар берилган эди.