Ўзбекистонда саноати 100 млн доллардан ошган туманлар 116 тага етди

Ўзбекистонда саноати 100 миллион доллардан ошган туманлар сони 66 тадан 116 тага кўпайди. Бу ҳақда бугун, 18 август куни Президентнинг Хивада бўлиб ўтаётган очиқ мулоқотида маълум қилинди.

“Бугун тадбиркорларимиз “бизнесни бошлаш” босқичидан “капитални кўпайтириш” босқичига ўтяпти”, дейди давлат раҳбари.

Қайд этилишича, беш йилда корхоналарнинг асосий капиталга инвестицияси 3 карра кўпайиб, 363 триллион сўмга етган. Саноати 100 миллион доллардан ошган туманлар сони 66 тадан 116 тага кўпайган.

Ахборот технологиялари, финтех ва бошқа сервис соҳаларининг жадал ривожланаётгани ҳисобига хизматлар ҳажми 1 триллион сўмлик маррадан ўтган туманлар сони 41 тадан 152 тага етган. Етакчи халқаро маркетплейслар билан ишлаётган корхоналар эса 3,5 мингтани ташкил этмоқда.

Бизнесини маҳаллада бошлаб, юртимиз бўйлаб ўнлаб филиалларга эга бўлган тадбиркорлар 550 тадан, миллий брендини яратганлар 300 тадан ошган.

Сўнгги йилларда мис, олтин, металл прокат, полиэтилен, ПВХ, каолин ва бошқа хомашёларнинг таклифи оширилган. Натижада электротехника, қурилиш материаллари, фармацевтика, тўқимачилик ва мебелсозлик каби соҳаларда “катта сакраш” қилинган.

Электромобиль, полимер ва маиший кимё, “яшил” энергетика, заргарлик саноати каби янги йўналишлар шаклланган. “BYD”, “ADM Jizzakh”, “ Sirdaryo Asaka Motors” каби замонавий автомобиль заводлари соҳага янги компетенция ва технологиялар олиб кирган.