Ўзбекистонда ишсизликдан холи маҳаллалар сони 1 889 тага етди

Ҳар йили меҳнат бозорига 600 мингдан ортиқ ёшлар кириб келмоқда. 2030 йилга бориб бу кўрсаткич 1 миллион нафарга етади.  Бу ҳақда бугун, 14 февраль куни Кўксарой қароргоҳида Президент Шавкат Мирзиёевнинг Ўзбекистон ёшлари билан ўтказаётган мулоқотида маълум қилинди. 

Қайд этилишича, бу борада ёшларни қўллаб-қувватлаш тизими яратилган. Биргина “Ёшлар дафтари” орқали ўтган йили 180 минг нафар ёшларга 345 миллиард сўмлик ёрдам кўрсатилган.

Билдирилишича, ўтган 8 йилда ёш тадбиркорлар сони 3 карра кўпайиб, бугун бизнес вакилларининг салкам 40 фоизини ёшлар ташкил этмоқда. Ишсиз ёшлар 2 карра камайган. Ишсизликдан холи маҳаллалар сони 1 минг 889 тага етган. 

Шу билан бирга, Шўрчи, Бувайда, Фурқат, Касби, Фориш туманларида ишсиз ёшлар кўплиги у ердаги раҳбарларнинг масъулиятсизлигидан далолатлиги кўрсатиб ўтилган.

Эслатиб ўтамиз, ҳозирги вақтда дунёдаги "топ" олийгоҳларда 1,5 мингдан зиёд ўзбекистонлик талабалар таҳсил олаётгани маълум қилинганди.