O‘zbekistonda ishsizlikdan xoli mahallalar soni 1 889 taga yetdi

Har yili mehnat bozoriga 600 mingdan ortiq yoshlar kirib kelmoqda. 2030 yilga borib bu ko‘rsatkich 1 million nafarga yetadi.  Bu haqda bugun, 14 fevral kuni Ko‘ksaroy qarorgohida Prezident Shavkat Mirziyoyevning O‘zbekiston yoshlari bilan o‘tkazayotgan muloqotida ma’lum qilindi. 

Qayd etilishicha, bu borada yoshlarni qo‘llab-quvvatlash tizimi yaratilgan. Birgina “Yoshlar daftari” orqali o‘tgan yili 180 ming nafar yoshlarga 345 milliard so‘mlik yordam ko‘rsatilgan.

Bildirilishicha, o‘tgan 8 yilda yosh tadbirkorlar soni 3 karra ko‘payib, bugun biznes vakillarining salkam 40 foizini yoshlar tashkil etmoqda. Ishsiz yoshlar 2 karra kamaygan. Ishsizlikdan xoli mahallalar soni 1 ming 889 taga yetgan. 

Shu bilan birga, Sho‘rchi, Buvayda, Furqat, Kasbi, Forish tumanlarida ishsiz yoshlar ko‘pligi u yerdagi rahbarlarning mas’uliyatsizligidan dalolatligi ko‘rsatib o‘tilgan.

Eslatib o‘tamiz, hozirgi vaqtda dunyodagi "top" oliygohlarda 1,5 mingdan ziyod o‘zbekistonlik talabalar tahsil olayotgani ma’lum qilingandi.