Ўзбекистон Қозоғистондан 35 минг тонна нефть олади

Қозоғистондаги “KazTransOil” акциядорлик жамияти бугун, 15 декабрь куни қўшни давлатларга нефть ташиш ҳажмини оширганини маълум қилди.  

“KazTransOil” АЖ жорий йил декабрь ойида Ўзбекистон Республикаси йўналишида нефть транзити қайта тикланганини, шунингдек, Қирғиз Республикасига нефть етказиб бериш ҳажмларини оширганини маълум қилди. Қайд этилишича, жорий йил декабрь ойида Ўзбекистонга нефть транзити 35 минг тонна ҳажмда амалга оширилиши режалаштирилган.

Қирғизистонга нефть етказиб бериш жорий йил ноябрь ойида қайта бошланган. Бунга қадар ушбу йўналишда нефть ташиш охирги марта 2017 йилда амалга оширилган эди. “KazTransOil” 2025 йил охиригача Қирғизистонга 30 минг тоннагача нефть етказиб беришни режалаштирмоқда.

Икки йўналиш бўйича нефть етказиб беришнинг умумий ҳажми 65 минг тоннагача бўлиб, шундан 55 минг тоннаси жорий ой ҳиссасига тўғри келади.

Нефть барча йўналишлар бўйича “КazTransOil” магистраль нефть қувурлари тизими орқали “Шағир” нефть қуйиш пунктигача етказилади. У ерда нефть темирйўл цистерналарига қуйилади.

Қайд этилишича, нефть ташишдаги ижобий динамика халқаро ҳамкорлар билан самарали ва ўзаро манфаатли ҳамкорлик натижасида таъминланган.
Эслатиб ўтамиз, олдинроқ Қозоғистон Европага нефть етказиб беришни ошириши ҳақида хабар берилганди. 2025 йилнинг октябрида “KazTransOil” акциядорлик жамияти “Транснефть”нинг магистраль нефть қувурлари тизимига Германия йўналишидаги “Адамова застава” нефть қабул нуқтаси орқали 225 минг тонна қозоқ нефтини жўнатди.