Ўзбекистон аҳолиси қарийб 38 млн нафарга етди

2025 йилнинг 1 июль ҳолатига кўра, Ўзбекистонда доимий аҳоли сони қарийб 37 859 698 кишини ташкил этган. Бу ҳақда Миллий статистика қўмитаси хабар берди.

Қайд этилишича, ушбу кўрсаткич 2024 йилнинг мос даврига нисбатан 2 фоизга ошган.

Шундан:

• Аёллар сони – 18,8 млн киши;
• Эркаклар сони – 19,1 млн киши;
• Шаҳар жойларда – 19,3 млн киши;
• Қишлоқ жойларда – 18,6 млн киши истиқомат қилади.

World Population Review маълумотига кўра, бугунги кунда 1 млрд 463 млн аҳоли билан Ҳиндистон дунёда биринчи ўринда бўлса, 1 млрд 416 млн аҳолиси билан Хитой бу борада иккинчи ўринни банд этган. Кучли учликдаги АҚШнинг 347 млн нафар доимий аҳолиси бор. Ўзбекистон бу рўхатда 43-поғонадан ўрин олган.

Эслатиб ўтамиз, аввалроқ Ўзбекистон Республикаси ҳудудлари бўйича туғилишда кутилаётган умр кўриш давомийлиги бўйича Тошкент шаҳри аҳолиси етакчилик қилаётгани хабар қилинганди. Пойтахтда ушбу кўрсаткич 76,8 ёшни ташкил этмоқда.