Уюшган жиноий гуруҳ аъзоси “Шукун” қўлга олинди (видео)

Қирғизистонда ўта оғир жиноятларни содир этгани учун муқаддам судланган, “Шукун” лақаби билан танилган шахс ушланди. Бу ҳақда мамлакатнинг Миллий хавфсизлик давлат қўмитаси матбуот хизмати хабар берди.

Тергов маълумотларига кўра, у уюшган жиноий гуруҳ аъзоси сифатида рўйхатга олинган. Жиноий доираларда анча танилган Т.Ш.Т. жиноий ғояни фаол равишда тарқатиб, унга ёшларни жалб қилган, шунингдек, ҳудудда яширин иқтисодий оқимларни назорат қилган.

Эркак қўлга олинган вақтда гиёҳванд модда таъсирида бўлган. У вақтинчалик сақлаш ҳибсхонасига жойлаштирилган.

Эслатиб ўтамиз, аввалроқ қирғизистонлик марҳум криминал авторитет Қамчибек Кўлбоев (Қамчибек Асанбек)нинг тансоқчиси Улан Барчакеев Москва шаҳрида қўлга олинганди. 53 ёшли Барчакеев жиноят оламида “Узун Улан” лақаби билан танилган. У Қамчибек Кўлбоевнинг яқин ва ишончли одами бўлган ва унинг шахсий хавфсизлиги учун жавобгар бўлган.