USAID Трампни судга бермоқчи

АҚШ Халқаро тараққиёт агентлиги (USAID) уни тугатиш ҳақида таклиф бергани учун Президент Дональд Трамп ва унинг маъмурияти аъзолари устидан судга мурожаат қилмоқчи. Бу ҳақда NPR хабар берди.

Қайд этилишича, даъво аризасида USAID’ни тарқатиб юбориш бўйича ҳаракатлар конституцияга зид ва ноқонуний бўлгани ҳамда Америка етакчиси президентлик ваколатларидан ошиб кетгани таъкидланган. 

“Ушбу ҳаракатлар USAID ходимлари, грант олувчилар ва пудратчиларнинг муҳим ишларини кескин тўхтатиб, глобал гуманитар инқирозни келтириб чиқарди. Улар минглаб америкалик иш ўринларининг йўқолишига олиб келди”, дейилади хабарда. 

Ташкилотнинг таъкидлашича, USAID’нинг тўхтатилиши АҚШ миллий хавфсизлигига таҳдид солиши ва минглаб америкаликнинг иш жойларини йўқотишига олиб келиши мумкин. 

Қайд этилишича, айбланувчилар орасида Оқ уйдаги шахслардан ташқари Давлат котиби Марко Рубио ва Молия вазири Скотт Бессантнинг ҳам исмлари кўрсатилган.

“Reuters” агентлиги кеча, 6 февраль куни кечқурун Дональд Трамп маъмурияти USAID ходимлари сонини 10 минг нафардан 290 нафаргача қисқартириш ниятида эканини маълум қилди. Нашрнинг аноним манбаларига кўра, ҳайдалмаган кичик ходимлар соғлиқни сақлаш ва гуманитар ёрдамга ихтисослашган ишчиларни ўз ичига олади.

Маълумот учун, АҚШ Халқаро тараққиёт агентлиги (USAID) АҚШ ҳукумати таркибига кирувчи мустақил агентлик бўлиб, бошқа мамлакатларга ёрдам бериш мақсадида ташкил этилган. У 1961 йилда ташкил топган ва турли агентликларнинг функцияларини бирлаштирган. Гарчи расмий жиҳатдан мустақил давлат агентлиги бўлсада, USAID АҚШ Президенти, Давлат котиби ва Миллий хавфсизлик кенгашига бўйсунади. USAID’нинг асосий фаолияти иқтисодий ривожланиш, соғлиқни сақлаш, таълим, гуманитар ёрдам, демократияни қўллаб-қувватлаш ва АҚШ халқаро сиёсий мақсадларини илгари суришдан иборат.

Эслатиб ўтамиз, аввалроқ Microsoft корпорацияси асосчиси Билл Гейтс АҚШ Президенти Дональд Трамп билан Оқ уйда учрашув чоғида USAID орқали хорижий ёрдам ажратишни давом эттиришга чақирганди. Microsoft асосчиси ҳозирча АҚШ қайси хорижий ёрдам дастурларини давом эттиришини аниқ билмаслигини қайд этган. Унинг сўзларига кўра, USAID’га ўхшаш ташкилотни қайта яратиш Қўшма Штатлар учун жуда қийин бўлади. Шу билан бирга, Билл Гейтс агентликни ёпиш ташаббускори бўлган Илон Маск билан ҳали учрашмаганини маълум қилган.