Билл Гейтс Трамп билан USAID тақдирини муҳокама қилди

Microsoft корпорацияси асосчиси Билл Гейтс АҚШ Президенти Дональд Трамп билан Оқ уйда учрашув чоғида АҚШ Халқаро тараққиёт агентлиги (USAID) орқали хорижий ёрдам ажратишни давом эттиришга чақирди. Бу ҳақда NBC телеканали хабар берди.

“Гейтс 5 февраль куни Оқ уйда Трамп билан учрашиб, USAID орқали хорижий ёрдамни давом эттириш зарурлиги ҳақида гапирди”, дейилади телеканал хабарида.

Microsoft асосчиси ҳозирча АҚШ қайси хорижий ёрдам дастурларини давом эттиришини аниқ билмаслигини қайд этган. Унинг сўзларига кўра, USAID’га ўхшаш ташкилотни қайта яратиш Қўшма Штатлар учун жуда қийин бўлади. Шу билан бирга, Microsoft асосчиси Маск билан, яъни агентликни ёпиш ташаббускори билан учрашмаганини маълум қилган.

31 январь куни АҚШ Халқаро тараққиёт агентлиги (USAID) бутун дунё бўйлаб айрим истиснолардан ташқари тўғридан тўғри ёлланган барча ходимлари маъмурий таътилга чиқарилишини эълон қилди. CBS телеканали манбаларига кўра, барча USAID хориждаги ваколатхоналарига ёпилиш буюрилган ва уларнинг бутун ходимлари 7 февраль кунига қадар чақириб олинади.

Маълумот учун, АҚШ Халқаро тараққиёт агентлиги (USAID) АҚШ ҳукумати таркибига кирувчи мустақил агентлик бўлиб, бошқа мамлакатларга ёрдам бериш мақсадида ташкил этилган. У 1961 йилда ташкил топган ва турли агентликларнинг функцияларини бирлаштирган. Гарчи расмий жиҳатдан мустақил давлат агентлиги бўлса-да, USAID АҚШ Президенти, Давлат котиби ва Миллий хавфсизлик кенгашига бўйсунади. USAID’нинг асосий фаолияти иқтисодий ривожланиш, соғлиқни сақлаш, таълим, гуманитар ёрдам, демократияни қўллаб-қувватлаш ва АҚШ халқаро сиёсий мақсадларини илгари суришдан иборат.
 
Эслатиб ўтамиз, АҚШ Давлат бошқаруви самарадорлиги бўйича янги департаментининг (DOGE) раҳбари ва тадбиркор Илон Маск жорий йил 2 февраль куни USAID’ни “жиноятчи ташкилот” деб атаб, унинг “ўлиш вақти келганини” билдирган эди. 3 февраль куни эса Маск Трамп USAID’ни ёпишга рози бўлганини эълон қилди. Шунингдек, DOGE раҳбари агентликни ёпиш жараёни “аллақачон бошланганини” таъкидлади. Ташкилотнинг ўзи эса ходимларига USAID’нинг штаб-квартираси ёпилиши ҳақида электрон хат юборган. Ушбу хатда USAID бош биносида фаолият юритадиган ходимлар масофадан ишлаши, бинонинг иш фаолиятини таъминлаш учун зарур бўлган ходимларнинг эса раҳбарият қарорига кўра ишни давом эттириши таъкидланган.