Декан ўринбосари тажовуз қилгани айтилган қизнинг номақбул видеолари тарқалди. Одамлар нима деяпти?

Жорий йилнинг октябрь ойида жамоатчилик ўртасида кенг муҳокамаларга сабаб бўлган Тошкент давлат Педагогика университети факультети “замдекани” Боғабек Йўлдошев ва талаба қиз Муштарий Комилова можароси атрофида мунозаралар қайта “жонланди”.

Куни кеча ижтимоий тармоқларда россиялик блогер томонидан Муштарий Комилованинг номақбул ҳолатдаги видеолари сиздирилди. Бунинг ортидан талаба Комилова атрофида яна муҳокамалар бошланди.

Хусусан, Миллий масс-медиани қўллаб-қувватлаш ва ривожлантириш жамоат фонди васийлик кенгаши раиси Комил Алламжонов тарқалган видео юзасидан муносабат билдириб, илм масканида номақбул ишларни қиладиган бундай ходимлар бўлишини қоралади.

“Педуниверситетдаги қизнинг турли видеолари тарқаляпти. Дейлик, ўша қиз ёмон эмас, ўта ёмон. Лекин таълим ва тарбия учун жавобгар бўлган деканат бундай ҳолатларни бартараф этиш ўрнига иштирокчи, бевосита  ижрочи бўлгани учун ҳам айбдор. Қиз ёшлик қилгандир, лекин декан ўринбосари ёш эмас. Домла домладек юриши керак. Илм масканида шу ишларни қилдими, едими? Тўласин! Деканларни бу аҳволини кўриб, эртага бундай муҳитни кўрган ота-она қандай қилиб ўз фарзандини ишониб, хотиржам ўқишга юборади? Масала шунда. Таълим масканида бундай ишни қилган ҳар қандай масъул раҳбарлар жиддий жазоланиши керак. Ҳаммага ўрнак бўладиган даражада жазолансин.

Энди видеони ким тарқатяпти? У қиз уни қайсидир эркакка  юборган-да. Аёл кишига бўлмаса керак. Қайсидир эркак чиқардида ўша видеони ҳам. Агар ўша одам мард бўлса, бу қизнинг ушбу видеосига ўз жавоб видеоси ёки ёзган текстини ҳам юборсин. Хуллас бундай эркакларни ҳезалак дейди. Айтмоқчиманки, қиз дейлик ёмон бўлса ҳам йигитлар ундан кўп пасткашлик қилишяпти. Майдалашиб, жирканчлашиб, кетяпмиз кундан кунга. Бунинг ҳаммаси илмсизлик оқибати. Бошқа сабаб йўқ”, дейди Алламжонов.

Ҳуқуқшунос-блогер Зафарбек Солижонов ҳам воқеа юзасидан ўз фикрини билдирди.

“Мен суд ҳукмини кутиш керак, ундан сўнг суд ҳукми асосида ўз фикримизни билдиришимиз мумкин ва адолатдан бўлади деб, чиқиш қилган эдим. Бундан ташқари ўша қиз ва унинг онаси берган интервьюсида бир қанча саволлар пайдо бўлгани ҳақида ўз муносабатимни билдирган эдим. Асосий урғу кутиш режими ҳақида эди. Бироқ, менинг ушбу позициямга ҳам ўзининг салбий муносабатини билдириб, мени қандайдир “заказ”ларни бажарганликда ҳам айблаганлар топилди.

Бугун ҳам ўша позицияни сақлаймиз. Воқеалар ривожида амалдаги ТДПУ ректори ишдан олинди ва бу жамоатчилик томонидан кўплаб саволларни келтириб чиқарди.”Нима ректор ҳар битта ҳолатни назорат қилиши керакми? Суд ҳукми чиқмасдан туриб ректорни лавозимидан олиш ноҳақлик”, деган фуқаролар ҳам бўлди.

Ижтимоий тармоқларда Искандар исмли блогер ва “Озодлик радиоси”да у қиз ҳақидаги бир қанча видеолар тарқатилди. “Сукут сақлама” лойиҳасида чиққан маълумотларга кўра, бу видеолар жорий йилнинг баҳорида олинган ва қиз йигитига юборган бўлган. Бироқ бу видео қандай қилиб тарқалиб кетгани ҳақида ҳам савол пайдо бўлмоқда. “Жабрдийда” деб айтилаётган тарафнинг айтишича бу айнан ўша терговчи томонидан чиқариб юборилган бўлиши мумкин”, дея вазиятга муносабат билдирган.

Шунингдек, у тарқалган видеолар қизни ёмон, "замдекан"ни эса, яхши дейишга асос бўла олмаслигини урғулаган. Вазиятга бир томонлама эмас, ҳуқуқий жиҳатдан ёндашиш кераклиги таъкидланган.

Унинг фикрича, видео чиққанидан сўнг, қизни айблаб турган тарафнинг позицияси янада мустаҳкамланиши мумкинлиги хавотирли. Блогер видео айнан кимга юборилгани номаълумлиги аввал, буни аниқлаш ва "замдекан"га юборилган тақдирда ҳам, у 100 фоиз зўравонлик қилмаганлигига далил бўла олмаслигини таъкидлаган.

Жорий йилнинг 21 декабрь куни ўтказилган “Тошкент ёшлар форуми”да талаба Муштарий Комилова Тошкент давлат педагогика университетида декан ўринбосари лавозимида ишловчи Боғабек Йўлдошев нафақат Муштарий Комиловага балки, унинг бошқа курсдошларига ҳам турли сўзлар билан шилқимлик қилганини маълум қилганди.

Маълумот учун, жабрланувчи Муштарибону Комилованинг иддаосига кўра, у жорий йилнинг 18 октябр куни “Зулфия” номидаги давлат мукофотига тавсиянома олиш мақсадида ёшлар ишлари бўйича декан ўринбосари Боғабек Йўлдошев хонасига кирган. Декан хонасидан ҳамма чиқиб кетгач, эшикни қулфлаб, унга тегажоғлик қилган. Қизни диванга ётқизмоқчи бўлганда, у қаршилк кўрсатган ва дераза олдига бориб қолган. Ниятига етолмаган Боғабек Йўлдошев уни итариб юборган.

Шу билан бирга, декан ўринбосари Боғабек Йўлдошев тергов вақтида талаба қизнинг ўзи йигитидан қўрқиб деразадан сакраганини айтган.

Ҳозирда Боғабек Йўлдошев ҳибсга олинган. Ҳолат бўйича Яккасарой тумани ИИО ФМБ тергов бўлими томонидан Ўзбекистон Республикаси Жиноят кодексининг 118-моддаси (“Номусга тегиш”) ва 105-модда (“Қасддан баданга ўртача оғир шикаст етказиш”) аломатлари билан жиноят иши қўзғатилган.

Бўлиб ўтган воқеа тавсилотлари ОАВ вакиллари томонидан ёритилиб, оммага тақдим этилган ва аҳоли ўртасида кенг муҳокамага сабаб бўлганди.

Шунингдек, мазкур ҳолатдан сўнг Вазирлар Маҳкамаси қарори билан  Қирғизбоев Абдуғаффор Каримжонович Низомий номидаги Тошкент давлат педагогика университети ректори этиб тайинланиб, собиқ ректор Алишер Умаров лавозимидан озод этилди.

Қайд этиш керакки, ушбу ҳолатга мамлакат Президентининг тўнғич қизи – Миллий масс-медиани қўллаб-қувватлаш ва ривожлантириш жамоат фонди Васийлик Кенгаши раиси ўринбосари Саида Мирзиёева муносабат билдириб, “талаба қизларга нисбатан шилқимлик – жиддий муаммо” эканини таъкидлаган.