Университет талабалари сунъий интеллектга ёздирган иншоси учун аъло баҳо олди

Буюк Британиянинг Кардифф университети талабалари ChatGPT ёрдамида ёзилган иншо учун юқори баҳо олди. Бу ҳақда BBC хабар берди. 

Маълум қилинишича, BBC нашрига интервью берган талабалардан бири сунъий интеллект ёрдамида тажриба ўтказгани ҳақида ҳикоя қилиб берган. Исми сир қолишини истаган йигит январь ойида 2500 та сўздан иборат иккита иншо ёзган. Улардан бирини эса ChatGPT ёрдамида тайёрлаган. У ўзи ёзган иншоси жуда паст – 2,1 балл олгани ҳолда, сунъий интеллект яратган иншо учун энг юқори баллга лойиқ кўрилган.

Шунингдек, у ўз иншоларини режалаштириш ва шакллантириш учун сунъий интеллектдан фойдаланишда давом этишини тан олган. 

Яқинда Кардифф университетига берилган ахборот эркинлиги бўйича сўровда 2023 йил январь ойидаги баҳолаш даврида университетнинг шахсий Wi-Fi тармоқларида ChatGPT сайтига 14 443 марта ташриф буюрилганлиги аниқланди. Ваҳоланки, бир ой олдин бу кўрсаткич нолга тенг бўлгани қайд этилган. 

Университетнинг бошқа бир талабаси ҳам иншо ёзиш учун чатбот хизматидан фойдаланганини тан олган. Талабалар сунъий интеллект томонидан ёзилган ишни ҳеч ким ҳақиқийси билан ажрата олмаганини таъкидлаган. 

Эслатиб ўтамиз, аввалроқ ChatGPT бир неча сония ичида беморга тўғри ташхис қўйган эди. Шунингдек, сунъий интеллект футбол бўйича барча даврларнинг энг кучли ўйинчиларидан иборат рамзий терма жамоани ҳам тузиб чиққанди.

Нодиржон Мадаминов