“Uning kayfiyati yaxshi” Boris Jonsonning ahvoli haqida ma’lumot berildi

Koronavirusga chalingan Buyuk Britaniya Bosh vaziri Boris Jonsonning ahvoli yaxshilanishda davom etmoqda. Bu haqda Bosh vazir ofisi xabar berdi.

"Bosh vazir tunni yaxshi o‘tkazdi. Uni davolash Sent-Tomas shifoxonasining reanimatsiya bo‘limida davom etmoqda. Uning kayfiyati yaxshi", deydi Bosh vazir vakili.

U shuningdek, Jonsonning o‘zi nafas olayotganiga aniqlik kiritdi. Ta’kidlashicha, Jonsonga kislorod ventilyatori ulanmagan.

“Agar kerak bo‘lsa, u odamlar bilan suhbatlasha oladi”, deydi idora vakili.

Eslatib o‘tamiz, Jonson joriy yilning 27 mart kuni koronavirus bilan kasallanganini e’lon qildi. O‘shandan beri u izolatsiyada edi. 3 aprel kuni u videomurojaatida hali ham yuqori haroratga ega ekanini e’lon qildi. 5 aprel kuni kechqurun Jonson zarur tekshiruvlar uchun shifoxonaga yotqizilgani ma’lum bo‘ldi. 6 aprel kuni kechqurun Jonsonning ahvoli yomonlashgani va uni reanimatsiyaga yotqizilgani haqida xabar berildi.