Украинанинг Қрим кўпригига ҳужуми акс этган видео эълон қилинди (видео)

Украина хавфсизлик хизмати Американинг CNN телеканалига Қрим кўприги портлатилиши акс этган кадрларни тақдим этди. Кеча, 15 август куни телеканал видеони эълон қилди.

Айтилишича, мазкур кадрлар жорий йилнинг 17 июль куни Украина денгиз дронидан, шунингдек, кўприк устидаги видеокамераларнинг биридан олинган. Видеодан кўриниб турибдики, кўприк икки сув усти дрони томонидан портлатилган. Украина Хавфсизлик хизмати (УХХ)нинг маълум қилишича, дронлар кўприкнинг бетон таянчларига 850 килограмга яқин портловчи моддани етказган, улардан бири йўлга, иккинчиси темир йўл ўтган кўприкнинг қарама-қарши томонидан сузиб кетган.

УХХ раҳбари Василий Малюкнинг телеканалга айтишича, Украина денгиз дронлари ёрдамида “Оленегорский горняк” йирик десант кемаси ва “Сиг” нефть танкерига зарба берган. Шунингдек, телеканал дроннинг десант кемаси томон сузаётгани акс этган тасвирларни ҳам эълон қилган.

“Биз бир қатор янги қизиқарли операциялар устида ишлаяпмиз, жумладан, Қора денгизда. Сизга ваъда бераман, бу, айниқса, душманларимиз учун қизиқарли бўлади”, деган Малюк. 

Унинг таъкидлашича, Ғарб разведка хизматлари УХХга денгиз операцияларини амалга оширишда ёрдам бермаяпти. Унинг сўзларига кўра, дронлар Украинадаги ер ости заводида йиғилган.

Эслатиб ўтамиз, жорий йилнинг 17 июль куни Қрим кўприги сув усти дронлари томонидан ҳужумга учраган, оқибатда Белгород вилоятидан эр-хотин ҳалок бўлган, уларнинг қизи жароҳат олганди. 4 август “Оленегорский горняк” йирик десант кемаси Новороссийскдаги денгиз базасида ҳужумга учради. Россия Федерацияси Мудофаа вазирлиги кема етказган зарарнинг моҳиятини изоҳламади. 5 август куни эса Керчь бўғозида Россиянинг “Сиг” нефть танкерига дрон ҳужум қилди.