Украинага НАТОга кириш ваъда қилинмаган – Рютте

НАТО Украинага Россия билан можарони тинч йўл билан ҳал қилиш бўйича келишув доирасида альянсга қўшилиш ҳақида ваъда бермаган, бу узоқ муддатли кўриб чиқишни талаб қиладиган масала бўлиб қолмоқда. Бу ҳақда НАТО Бош котиби Марк Рютте Брюсселда расмий ташриф билан борган Германия канцлери Фридрих Мерц билан қўшма матбуот анжуманида маълум қилди.

Бош котибнинг сўзларига кўра, НАТО Украинага охиригача ёрдам беришга ваъда берган холос.

“НАТО Украинага қайтмас йўлни ваъда қилди, аммо биз ҳеч қачон бу тинчлик келишуви натижаси бўлишига ваъда бермаганмиз. Биз бу узоқроқ истиқболга мўлжалланган масала деб ҳисоблаймиз”, деган у.

Шунингдек, Рютте “Россия билан можаро тугаганидан кейин хавфсизлик кафолатлари”нинг бир қисми сифатида НАТО Украинани альянсга таклиф қилиш ғоясини қўллаб-қувватлайдими, деган саволга ҳам бу номаълумлигини айтган.

Унинг сўзларига кўра, Украинанинг альянсга узоқ муддатли истиқболда аъзо бўлиш эҳтимоли бор, бироқ ҳозирда олиб борилаётган тинчлик музокаралари доирасида эмас.

Шу билан бирга, аввалроқ Украина Бош вазирининг ўринбосари Ольга Стефанишина Украинанинг Шимолий Атлантика альянсига қўшилишига НАТОнинг барча давлатлари рози бўлганини маълум қилганди.

Эслатиб ўтамиз, Германия канцлери Фридрих Мерц, Франция Президенти Эммануэль Макрон ва Буюк Британия Бош вазири Кир Стармер бугун, 10 май куни эрталаб Киевдаги асосий темирйўл вокзалига етиб боргани ҳақида хабар берилган эди.