Украинага қарши урушда қатнашган ўзбекистонлик 5 йилга қамалди

Кеча, 4 ноябрь куни Украина ҳудудида ҳарбий ҳаракатларда иштирок этган Ўзбекистон фуқароси 5 йил муддатга озодликдан маҳрум қилинди. QALAMPIR.UZ суд ҳукми билан танишди.

Суд ҳужжатларида қайд этилишича, судланувчи Алишер Холиқов 1973 йилда Фарғона вилоятининг Қўштепа туманида туғилган. У бундан бир йил олдин – 2023 йилнинг 26 май куни “Дўстлик” божхона пости орқали Қирғизистонга йўл олган. У ердан Ўш-Санкт-Петербург рейси билан Россияга учиб кетган ва 2023 йил ноябригача вақтинчалик ишлар билан шуғулланиб, ижарада яшаган.

У судда ўз айбига иқрор бўлган. Унинг сўзларига кўра, марғилонлик Ўринбой исмли таниши унга қўнғироқ қилиб, ҳар бир қоп нон учун 2500 рубль маош ваъда қилиб, Санкт-Петербургда новвой бўлиб ишлашни таклиф қилган. Дастлабки икки ой давомида Алишер новвой бўлиб ишлаган, бироқ Ўринбой ваъда қилган пулни тўламаган. Шундан сўнг у “Магнит” гипермаркетида учратган Умид исмли киши билан бирга уч ойга юк ташувчи бўлиб ишга кирган. Сурхондарё вилоятидан бўлган уларнинг Акмал исмли бошлиғи ҳам турли баҳоналар билан иш ҳақини тўламаган. Шу сабабли Алишер ва Умид бошлиғини калтаклаган.

Бошлиғини калтаклаган ушбу икки эркакни ҳимоя қилиш учун келган адвокат полиция бўлимида уларга ичимлик таклиф қилган. Улар эса бунга рози бўлган. Кейин адвокат унга Акмални калтаклаш беш йилгача қамоқ жазоси билан таҳдид қиладиган жиноят эканини айтган. Шу ўринда ҳимоя қилувчи жавобгарликдан қутулиш учун Украинадаги урушда иштирок этишни таклиф қилган. Алишер Холиқов эса жазодан қочиш имконияти деб тушуниб, Умид билан ушбу таклифга розилик берган ва улар полиция тақдим этган шартноманинг икки нусхасини имзолаган. Уларга ишдан озод қилиш тўғрисидаги ҳужжат берилган ва қўйиб юборилган.

Ҳужжатга кўра, 2023 йилнинг 24 ноябрь куни у Россия Мудофаа вазирлиги билан бир йил муддатга ҳарбий хизматни ўташ бўйича шартнома имзолаган ва Украина Россия таркибида жанговар ҳаракатларда қатнашишга розилик билдирган. Шундан сўнг, ўзбекистонлик илгари таниш бўлмаган 80 нафар шахс билан бирга Россия-Финляндия чегараси яқинидаги “Каминка” ҳарбий қисмига Мудофаа вазирлиги ҳарбий хизматчилари назорати остида жойлаштирилган. Бир неча кундан сўнг расмийлар унинг пластик картасига 500 минг рубль ўтказган. Холиқов 100 минг рублни ўзи учун қолдирган, 400 минг рублни эса турмуш ўртоғи С.М.нинг пластик картасига бўлиб-бўлиб ўтказиб берган.

Икки ой давомида Холиқов “Каминка” номли ҳарбий қисмда икки ой давомида жанговар ўқотар қурол ва ўқ-дорилардан фойдаланиш усулларини ўрганиб, жанговар тайёргарликдан ўтган. Кейин, 24 январь куни у Белгород вилоятининг Майский қишлоғидаги ҳарбий полигонга ўтказилган ва у ерда ўқишни давом эттирган. Уларга ҳарбий форма, гувоҳнома, жетон ва Калашников автомати берилган. У ерда уч кун давомида улар ўқ отишни ўрганган ва турли ҳарбий машқларни бажарган.

4 февраль куни Мудофаа вазирлигининг буйруғи билан у Ўзбекистоннинг биометрик паспортига эга бўлмаган яна 79 нафар шахс билан бирга, Ўзбекистон қонунчилигини бузган ҳолда, ҳарбий хизматчилар кузатувида Украина чегарасини ноқонуний кесиб ўтган. Улар ўзини мустақил деб эълон қилган Луганск халқ республикаси ҳудудида Россия томонида жанговар ҳаракатларда иштирок этиш учун борган. Чегарани кесиб ўтиш пайтида уларнинг колоннаси Украина томонидан дрон билан ўққа тутилган. Холиқов дрондан туширилган снаряд портлаши оқибатида бошининг чап чакка қисмидан, чап қўли, чап елкаси ва ўнг оёғидан жароҳат олган. У бир ой давомида даволанган Москвадаги шифохонада март ойида ўзига келган.

Россия унинг пластик картасига яна 300 минг рубль ўтказиб берган. Соғаяди, аммо ҳарбий ҳаракатларда қатнаша олмайди. Шу туфайли у таътил олади ва Санкт-Петербургдаги “Магнит” гипермаркети омбори ётоқхонасига қайтади. Уч кундан сўнг унинг хотини Ўзбекистонда қолган яшил биометрик паспортини олиб келган. У хотинига бўлиб ўтган воқеани айтиб берган, хотини эса Ўзбекистонга қайтишни таклиф қилган.

У аниқлик киритиб, чегарани ноқонуний кесиб ўтмагани ва паспортини “Каминка” ҳарбий қисмида ҳарбийлар олиб қўйганини айтган. Унга Россия фуқаролиги таклиф қилинган, лекин у рад этгани учун паспортини қайтариб беришмаган. Жорий йилнинг 4 июль куни Холиқов Санкт-Петербург – Тошкент рейсида Ўзбекистонга қайтиб келган.

Жиноят ишлари бўйича Фарғона вилояти Қўштепа туман судида Алишер Холиқов билан боғлиқ жиноят иши кўриб чиқилди ва суд ҳукми ўқиб эшиттирилди. Суд уни Жиноят кодексининг 154-моддаси 1-қисми (Чет давлатларнинг ҳарбий хизматига, хавфсизлик, полиция, ҳарбий адлия органлари ёки шунга ўхшаш бошқа органларига хизматга кириш, ёлланиш) бўйича айбдор деб топиб, 5 йил муддатга озодликдан маҳрум қилди.