Ukrainaga qarshi urushda qatnashgan o‘zbekistonlik 5 yilga qamaldi

Kecha, 4 noyabr kuni Ukraina hududida harbiy harakatlarda ishtirok etgan O‘zbekiston fuqarosi 5 yil muddatga ozodlikdan mahrum qilindi. QALAMPIR.UZ sud hukmi bilan tanishdi.

Sud hujjatlarida qayd etilishicha, sudlanuvchi Alisher Xoliqov 1973 yilda Farg‘ona viloyatining Qo‘shtepa tumanida tug‘ilgan. U bundan bir yil oldin – 2023 yilning 26 may kuni “Do‘stlik” bojxona posti orqali Qirg‘izistonga yo‘l olgan. U yerdan O‘sh-Sankt-Peterburg reysi bilan Rossiyaga uchib ketgan va 2023 yil noyabrigacha vaqtinchalik ishlar bilan shug‘ullanib, ijarada yashagan.

U sudda o‘z aybiga iqror bo‘lgan. Uning so‘zlariga ko‘ra, marg‘ilonlik O‘rinboy ismli tanishi unga qo‘ng‘iroq qilib, har bir qop non uchun 2500 rubl maosh va’da qilib, Sankt-Peterburgda novvoy bo‘lib ishlashni taklif qilgan. Dastlabki ikki oy davomida Alisher novvoy bo‘lib ishlagan, biroq O‘rinboy va’da qilgan pulni to‘lamagan. Shundan so‘ng u “Magnit” gipermarketida uchratgan Umid ismli kishi bilan birga uch oyga yuk tashuvchi bo‘lib ishga kirgan. Surxondaryo viloyatidan bo‘lgan ularning Akmal ismli boshlig‘i ham turli bahonalar bilan ish haqini to‘lamagan. Shu sababli Alisher va Umid boshlig‘ini kaltaklagan.

Boshlig‘ini kaltaklagan ushbu ikki erkakni himoya qilish uchun kelgan advokat politsiya bo‘limida ularga ichimlik taklif qilgan. Ular esa bunga rozi bo‘lgan. Keyin advokat unga Akmalni kaltaklash besh yilgacha qamoq jazosi bilan tahdid qiladigan jinoyat ekanini aytgan. Shu o‘rinda himoya qiluvchi javobgarlikdan qutulish uchun Ukrainadagi urushda ishtirok etishni taklif qilgan. Alisher Xoliqov esa jazodan qochish imkoniyati deb tushunib, Umid bilan ushbu taklifga rozilik bergan va ular politsiya taqdim etgan shartnomaning ikki nusxasini imzolagan. Ularga ishdan ozod qilish to‘g‘risidagi hujjat berilgan va qo‘yib yuborilgan.

Hujjatga ko‘ra, 2023 yilning 24 noyabr kuni u Rossiya Mudofaa vazirligi bilan bir yil muddatga harbiy xizmatni o‘tash bo‘yicha shartnoma imzolagan va Ukraina Rossiya tarkibida jangovar harakatlarda qatnashishga rozilik bildirgan. Shundan so‘ng, o‘zbekistonlik ilgari tanish bo‘lmagan 80 nafar shaxs bilan birga Rossiya-Finlyandiya chegarasi yaqinidagi “Kaminka” harbiy qismiga Mudofaa vazirligi harbiy xizmatchilari nazorati ostida joylashtirilgan. Bir necha kundan so‘ng rasmiylar uning plastik kartasiga 500 ming rubl o‘tkazgan. Xoliqov 100 ming rublni o‘zi uchun qoldirgan, 400 ming rublni esa turmush o‘rtog‘i S.M.ning plastik kartasiga bo‘lib-bo‘lib o‘tkazib bergan.

Ikki oy davomida Xoliqov “Kaminka” nomli harbiy qismda ikki oy davomida jangovar o‘qotar qurol va o‘q-dorilardan foydalanish usullarini o‘rganib, jangovar tayyorgarlikdan o‘tgan. Keyin, 24 yanvar kuni u Belgorod viloyatining Mayskiy qishlog‘idagi harbiy poligonga o‘tkazilgan va u yerda o‘qishni davom ettirgan. Ularga harbiy forma, guvohnoma, jeton va Kalashnikov avtomati berilgan. U yerda uch kun davomida ular o‘q otishni o‘rgangan va turli harbiy mashqlarni bajargan.

4 fevral kuni Mudofaa vazirligining buyrug‘i bilan u O‘zbekistonning biometrik pasportiga ega bo‘lmagan yana 79 nafar shaxs bilan birga, O‘zbekiston qonunchiligini buzgan holda, harbiy xizmatchilar kuzatuvida Ukraina chegarasini noqonuniy kesib o‘tgan. Ular o‘zini mustaqil deb e’lon qilgan Lugansk xalq respublikasi hududida Rossiya tomonida jangovar harakatlarda ishtirok etish uchun borgan. Chegarani kesib o‘tish paytida ularning kolonnasi Ukraina tomonidan dron bilan o‘qqa tutilgan. Xoliqov drondan tushirilgan snaryad portlashi oqibatida boshining chap chakka qismidan, chap qo‘li, chap yelkasi va o‘ng oyog‘idan jarohat olgan. U bir oy davomida davolangan Moskvadagi shifoxonada mart oyida o‘ziga kelgan.

Rossiya uning plastik kartasiga yana 300 ming rubl o‘tkazib bergan. Sog‘ayadi, ammo harbiy harakatlarda qatnasha olmaydi. Shu tufayli u ta’til oladi va Sankt-Peterburgdagi “Magnit” gipermarketi ombori yotoqxonasiga qaytadi. Uch kundan so‘ng uning xotini O‘zbekistonda qolgan yashil biometrik pasportini olib kelgan. U xotiniga bo‘lib o‘tgan voqeani aytib bergan, xotini esa O‘zbekistonga qaytishni taklif qilgan.

U aniqlik kiritib, chegarani noqonuniy kesib o‘tmagani va pasportini “Kaminka” harbiy qismida harbiylar olib qo‘yganini aytgan. Unga Rossiya fuqaroligi taklif qilingan, lekin u rad etgani uchun pasportini qaytarib berishmagan. Joriy yilning 4 iyul kuni Xoliqov Sankt-Peterburg – Toshkent reysida O‘zbekistonga qaytib kelgan.

Jinoyat ishlari bo‘yicha Farg‘ona viloyati Qo‘shtepa tuman sudida Alisher Xoliqov bilan bog‘liq jinoyat ishi ko‘rib chiqildi va sud hukmi o‘qib eshittirildi. Sud uni Jinoyat kodeksining 154-moddasi 1-qismi (Chet davlatlarning harbiy xizmatiga, xavfsizlik, politsiya, harbiy adliya organlari yoki shunga o‘xshash boshqa organlariga xizmatga kirish, yollanish) bo‘yicha aybdor deb topib, 5 yil muddatga ozodlikdan mahrum qildi.