Украинада бир неча ҳафта ичида ўт очишни тўхтатиш мумкин – Макрон

north_east

Трамп Путинни “диктатор” дейишдан тийилди: Макроннинг Оқ уйга ташрифи тафсилотлари

Франция Президенти Эммануэль Макрон, худди АҚШ Президенти Дональд Трамп каби, яқин бир неча ҳафта ичида Украинада ўт очишни тўхтатиш келишуви ўрнатилиши мумкин, деб ҳисоблайди. Бу ҳақда у кеча, 24 феврал куни кечқурун Оқ уйда Трамп билан учрашганидан кейин “Fox News” телеканалига берган интервьюсида сўз очди.

“Менимча, буни амалга ошириш мумкин. Ўйлайманки, бу яқин ҳафталарда содир бўлиши мумкин”, деди Макрон.

Аввалроқ Трамп ҳам Украинадаги уруш “ҳафталар ичида” якунланиши мумкинлигини айтганди.

“Президент Трампнинг ташаббуси жуда ижобий қадам”, деди  Макрон АҚШ Президентининг Россия етакчиси Владимир Путин билан алоқа ўрнатиш қарорини изоҳлар экан.

Франция раҳбари, шунингдек, Европа давлатларининг Россияга нисбатан ҳаракатлари ва 2022 йил февралида уруш бошланишидан олдин Украинадаги можаронинг олдинги босқичларига муносабатини танқидий баҳолади.

Макроннинг сўзларига кўра, 2014 йилда Донбассдаги сепаратистлар билан уруш ва Қримнинг аннексия қилиниши фонида келишилган ўт очишни тўхтатиш келишуви Москва томонидан доимий равишда бузилиб келинмоқда.

“Ва биз жавоб бермадик – ҳаммамиз”, деб тушунтирди Макрон.

У уч йил муқаддам Россиянинг Украинага ҳарбий бостириб кириши олдидан етарли даражада ушлаб туриш қобилиятининг йўқлигига ишора қилди. Макроннинг сўзларига кўра, бу Россиянинг қўшни давлатга қарши уруш бошлаш қарорига олиб келган.

“Ҳозир вақтинчалик сулҳ ёки узоқ муддатли оташкесимдан сўнг узоқ муддатли тинчлик учун музокаралар олиб борилиши муҳимдир. Шу билан бирга, хавфсизлик кафолатлари масалаларини муҳокама қилиш керак”, деб таъкидлади Макрон.

Унинг айтишича, Россияга қарши тўхтатувчи таъсир яратиш учун Украина армияси 800 мингга яқин аскарга эга бўлиши керак.

Макрон, шунингдек, Британия Бош вазири Кир Стармер билан тинчликпарвар кучлар зарур бўлган тақдирда Франция-Британия таклифи устида ишлаётганини айтди.

Эммануэль Макрон Франция ва бутун Европа ўз мудофаасини таъминлаш учун кўпроқ ҳаракат қилиши кераклигини тан олди.

“Президентингиз ҳақ”, деди у “Fox News” бошловчиси Брет Байерга.

Макроннинг таъкидлашича, якунда ҳудудларни бўлиш ва Украинани тиклаш масалаларини ҳал қиладиган тинчлик шартномаси имзоланиши керак.

Шу билан бирга, Франция Президенти Россия келишувни бузса, АҚШ қай даражада бирдамлик кўрсатишга тайёрлигини аниқ белгилаш зарурлигини таъкидлади. Макроннинг сўзларига кўра, нафақат Европа хавфсизлиги, балки АҚШнинг жаҳон саҳнасидаги ишончи ҳам хавф остида.