Трамп Путинни “диктатор” дейишдан тийилди: Макроннинг Оқ уйга ташрифи тафсилотлари

Кеча, 24 февраль куни Франция Президенти Эммануэль Макрон Оқ уйда АҚШ Президенти Дональд Трамп билан учрашди. Икки етакчи муҳокама қилган асосий мавзулардан бири Украинадаги уруш бўлди. Бу ҳақда CNN хабар берди.

Оқ уйда журналистлар олдида сўзлаган Макрон Европа Украинага ўт очишни тўхтатиш шарти билан хавфсизлик кафолатларини тақдим этишга тайёр эканини маълум қилди, жумладан, мамлакатга ҳарбийни жўнатиш масаласи ҳам кўриб чиқилмоқда. Бироқ таъкидланишича, тинчликпарвар кучлар фронт чизиғига юборилмайди.

Трамп эса Европа қўшинларининг тинчликпарвар сифатида Украинага жойлаштирилишига қарши эмаслигини билдирган ва бу масалани Россия Президенти Владимир Путин билан муҳокама қилганини айтган.

“Ҳа, у рози. Мен айнан шу саволни бердим. У бунга қарши эмас”, деди Трамп.

Бундан ташқари, матбуот анжуманида Россиянинг музлатилган активларини Украинага ёрдам учун ишлатиш масаласи ҳам муҳокама қилинган. Макрон Ғарб давлатларида музлатилган Россия активларини мусодара қилиш имконсизлигини, бу халқаро ҳуқуққа зид эканини айтган.

“Музлатилган активлардан тушган даромадни ишлатиш мумкин, аммо активларнинг ўзини олиш имконсиз. Бу халқаро ҳуқуққа зид ва биз уни ҳурмат қилмоқчимиз”, деди Макрон.

У, шунингдек, “Катта еттилик” (G7) давлатлари ушбу активлардан келадиган даромадларни Украинага ёрдам тариқасида йўналтириш бўйича келишувга эришганини эслатган.

“Бу санкцияларнинг бир қисми”, дейди у ва музлатилган маблағларнинг келажаги тинчлик музокараларининг бир қисми бўлиши кераклигини қўшимча қилди.

“Fox News”нинг хабар беришича, Макрон Россия ва Украина ўртасида яқин ҳафталар ичида сулҳга эришиш мумкинлигини айтган.

“Ҳаво, денгиз ва ерда сулҳ ўрнатилиши керак. Агар бу амалга ошмаса, Россиянинг урушни тўхтатиш нияти жиддий эмаслиги учун энг яхши далил бўлади”, деди у.

CNN телеканалига кўра, Трамп матбуот анжуманида бир нечта баёнотлар билан чиққан. АҚШ Президенти Макрон билан “энг муҳим масалалар бўйича” ҳамфикр эканини таъкидлаб, айни дам урушни тўхтатиш учун энг қулай фурсат эканини қайд этган. У, шунингдек, Макроннинг Украинага Россия томонидан босиб олинган ҳудудларнинг бир қисмини қайтариб олиш имконияти ҳақидаги фикрини қўллаб-қувватлаган, бироқ бу “осон эмаслигини” таъкидлаган.

Трамп, шунингдек, АҚШ Украинага ёрдам учун Европа давлатларига қараганда кўпроқ маблағ сарфлаётганини таъкидлаган. Бунга жавобан Макрон Трампни тўхтатиб, Европанинг Украинага ёрдами борасидаги “ҳақиқатни” эслатган. Киль Жаҳон иқтисодиёти институти маълумотларига кўра, Европа Иттифоқи ва Европа давлатлари Украинага ҳарбий, молиявий ва гуманитар ёрдам сифатида АҚШдан кўра анча кўпроқ маблағ ажратган – 2023 йил декабрь ҳолатига кўра, Европа 258 миллиард доллар, АҚШ эса 124 миллиард доллар ажратган.

CNN’га кўра, Макрон Трампнинг кўп йиллик алоқаларидан фойдаланиб, Украина ва АҚШ ўртасидаги келишмовчиликларни юмшатишга умид қилган.

“Учрашув охирида Трамп Украинадаги уруш учун ким жавобгар экани ёки Европа Киевни етарлича қўллаб-қувватлаганми, деган масалаларда ўз позициясини сезиларли даражада ўзгартирганига ўхшамади”, дейилади хабарда.

Шу билан бирга, Трамп матбуот анжуманида журналистнинг саволига жавоб бериб, Россия Президенти Владимир Путинни “диктатор” деб аташдан бош тортган.

“Мен бу сўзларни енгил-елпи ишлатмайман. Ҳаммаси қандай тугашини кўрамиз. Воқеалар ривожини кузатамиз”, дейди у.

Бир ҳафта олдин эса АҚШ Президенти Зеленскийни уруш даврида сайлов ўтказишдан бош тортгани учун “диктатор” деб атаганди. Зеленский ҳам аллақачон Трампнинг бу сўзларига жавоб берган.

Эслатиб ўтамиз, аввалроқ Эммануэль Макрон Дональд Трамп билан музокаралар ўтказиш учун Оқ уйга боргани хабар қилинганди. Макрон маъмурият алмашганидан кейин Трампнинг олдига ташриф буюрган биринчи Европа етакчисига айланган.