Украина Жаҳон банкидан 132 млн доллар олди. Пул нимага сарфланади?

Украина Жаҳон банкидан 132 миллион доллар кредит олди, бу маблағ қишлоқ хўжалигини қўллаб-қувватлаш учун ишлатилади. Бу ҳақда мамлакат Молия вазири Сергей Марченко маълум қилди.

“2023 йил 11 май куни Украина Жаҳон банкидан 132 миллион доллар миқдорида маблағ олди. Кредит маблағлари Украина давлат бюджетининг умумий жамғармасига “Қишлоқ хўжалигига хусусий сармоя киритишни жадаллаштириш” дастури лойиҳаси доирасида кўзда тутилган чора-тадбирларни амалга ошириш натижалари бўйича олинди”, дейди Марченко.

Вазирнинг сўзларига кўра, йиғилган маблағлар аграр соҳадаги устувор харажатларни қоплаш, озиқ-овқат саноатидаги вазиятни яхшилаш ва мамлакат озиқ-овқат хавфсизлигини таъминлаш имконини беради.

Эслатиб ўтамиз, жорий йилнинг сентябрь ойида Америка Қўшма Штатлари Жаҳон банки орқали Украинага 4,9 миллиард доллар бюджет ёрдами ажратишини эълон қилганди. Ушбу мақсадлар учун АҚШ умумий ҳисобда 18 миллиард доллар ўтказишни маъқуллаган.

Шунингдек, НАТО давлатлари Украинага 1550 та зирҳли техника, 230 та танк ва катта миқдордаги ўқ-дорилар етказиб берганди, бу барча ваъда қилинган ёрдамнинг 98 фоизини ташкил этади.