Украина ташаббуслари глобал тус олмоқда – Зеленский

Украина Президенти Владимир Зеленский кеча, 14 январь куни Швейцариянинг Давос шаҳрида бўлиб ўтган Тинчлик формуласи бўйича давлат раҳбарлари маслаҳатчиларининг учрашуви Киев ташаббуслари аста-секин глобал тус олаётганини тасдиқлашини айтди. Бу ҳақда у ўзининг кунлик видеомурожаатида сўз очди.

“Бугунги кунда йиғилишда 80 дан ортиқ давлат ва халқаро ташкилотлар вакиллари иштирок этмоқда. Нафақат Европа ва Шимолий Америкадаги одатий ҳамкорларимиз, балки Лотин Америкаси, Африка, Осиё ва Океания давлатлари ҳам. Мен бу ишимизда иштирок этаётган ҳар бир раҳбар ва ҳар бир давлатдан миннатдорман. Ўз иштироки билан улар ер юзида қоидаларга асосланган дунё тартибини истисносиз тиклаш зарурлигини тасдиқлайди”, дейди Зеленский.

Украина Президентининг сўзларига кўра, “Россия раҳбарияти” ўзларини зўравонлик, террор, ёлғон ва шафқатсизлик орқали қандайдир йиртқич дунё тартибини ўрнатишга қодир, деб ўйлайди. 

“Айнан мана шу  қотилларнинг ишончини биз ҳозир биргаликда камайтирмоқдамиз. Бугун Швейцариядаги учрашув Малта, Саудия Арабистони ва Даниядаги учрашувда бўлиб ўтган ишларни давом эттирмоқда. Мен бўлиб ўтган мунозаралар бўйича жамоамиздан, Украина жамоасидан батафсил ҳисоботни кутаман”, дейди у.

Шунингдек, Зеленский Руминия билан хавфсизлик кафолатлари бўйича музокаралар бошланганини қайд этган.

“Бугун Украина учун хавфсизлик кафолатлари бўйича ишлар давом этмоқда. Руминия билан музокаралар бошланди. Аллақачон ушбу тўққизинчи давлат билан бундай икки томонлама ишлар олиб борилмоқда. Бу G7 давлатлари плюс Нидерландия, плюс Руминия, ва яна кўплаб давлатлар бўлади”, дея таъкидлайди Президент.

Маълумот учун, бугун, 15 январь куни Зеленский Швейцария Конфедерацияси Президенти Виола Амҳерд билан учрашиш учун Бернга боради.

Эслатиб ўтамиз, 12 январь куни Буюк Британия Бош вазири Риши Сунак Киевга ташрифи давомида Президент Владимир Зеленский билан Украина НАТОга аъзо бўлгунга қадар амалда бўладиган хавфсизлик кафолатлари тўғрисидаги келишувни имзолаганди.