Украина Северск шаҳрини ҳам йўқотди

Донецк вилоятининг Бахмут туманидаги Северск шаҳридан украиналик ҳарбийлар “жангчиларнинг ҳаётини сақлаб қолиш ва бўлинмалар жанговар қобилиятини асраш мақсадида” чекинишга мажбур бўлди. Бу ҳақда Украина Қуролли кучлари Бош штаби хабар берди.

Бош штабда таъкидланишича, Северск атрофида оғир жанглар давом этмоқда, шаҳарнинг ўзи эса ҳанузгача Украина Қуролли кучларининг ўт очиш назорати остида қолмоқда.

Расмий баёнотда Россия қўшинлари Северск йўналишида “катта сон жиҳатидаги устунлик ва мураккаб об-ҳаво шароитида кичик штурм гуруҳлари орқали доимий босим ўтказиш” ҳисобига олдинга силжишга эришгани айтилган.

“Душман бўлинмаларининг янада олдинга ҳаракатланишига йўл қўймаслик мақсадида уларни блоклаш чоралари кўрилмоқда”, дейилади хабарда. 

Ҳарбий мавзулардаги Deep State номли жамоатчилик саҳифаси харитасида Северск шаҳри 13 декабрдан буён тўлиқ Россия назоратида ёки “кулранг зона” сифатида кўрсатилган.

Россия Қуролли кучлари Бош штаби эса 11 декабрь куни Северск устидан назорат ўрнатилганини эълон қилган эди. Ўшанда Украина томони шаҳар учун жанглар давом этаётганини билдирган.

Россия ҳарбийларининг таъкидлашича, Северскнинг эгалланиши Россия қўшинларига Северскдан тахминан 40 километр узоқликда жойлашган Славянск йўналишида ҳужумни ривожлантириш имконини беради.

Эслатиб ўтамиз, аввалроқ АҚШ Президенти Дональд Трамп Украина Президенти Владимир Зеленский мағлуб бўлаётгани ва у бу воқеликни борича қабул қилишни бошлаши кераклигини айтганди. Трамп Киев жуда кўп ҳудудларни йўқотганини қўшимча қилган.