Украина Россия учун жанг қилган хитойликларни қўлга олди

Украина Қуролли кучлари Россия армияси томонида жанг қилган икки нафар Хитой фуқаросини асирга олди. Бу ҳақда Украина Президенти Владимир Зеленский ўзининг Telegram-каналида маълум қилди.

Зеленскийнинг сўзларига кўра, Россия Федерацияси қўшинлари таркибида Хитой фуқаролари “икки нафардан кўпроқ” экани ҳақида маълумотлар мавжуд.

“Бу Украина ҳудудида – Донецк вилоятида содир бўлди. Бу асирларнинг ҳужжатлари, банк карталари, шахсий маълумотлари бор”, дейилади хабарда.

Шунингдек, Зеленский ҳозир барча ҳолатлар аниқланаётганини айтган. Қолаверса, у Украина Ташқи ишлар вазирига Пекин билан боғланиб, уларнинг содир бўлган воқеага муносабатини билиш бўйича топшириқ берган.

“Россиянинг Хитойни Европадаги бу урушга тўғридан тўғри ёки билвосита жалб қилиши – Путин урушни тугатишдан бошқа ҳамма нарсани қилмоқчи эканлигининг аниқ белгисидир. У жанг қилишни давом эттириш йўлини изламоқда. Бунга аниқ реакция керак”, деган Зеленский.

Эслатиб ўтамиз, аввалроқ  Шимолий Корея Россияга аскар юбориш эвазига Москвадан бир неча турдаги дронларни ишлаб чиқиш учун техник ёрдам олаётгани ҳақида хабар берилганди. Жанубий Корея ҳарбийларининг маълумотларига кўра, январь ва февраль ойларида КХДР Россияга яна тахминан 3 минг аскар юборган.