Украина Москвага юзлаб дронлар билан ҳужум қилди (видео)

Украина бир кеча давомида Москвага 430 дан ортиқ учувчисиз учиш аппаратини учирди. Бу ҳақда “Meduza” хабар берди.

Москва мэри Сергей Собяниннинг билдиришича, мудофаа кучлари дронларнинг асосий қисмини Москва вилоятига етиб боришидан аввал уриб туширган. Пойтахтга яқинлашган яна 36 та дрон зарарсизлантирилган.

Ҳужумлар сабаб Москванинг Шереметьево, Домодедово, Внуково ва Жуковский аэропортларида тунги вақтда парвозларга вақтинчалик чекловлар жорий этилган.

Россия Мудофаа вазирлиги эса бир кеча давомида мамлакатнинг турли ҳудудлари узра жами 452 та Украина дрони уриб туширилганини маълум қилган.

Шу билан бирга, Белгород вилояти ҳам ракета ҳужумига учраган. Вилоят губернатори вазифасини бажарувчи Александр Шуваевнинг маълум қилишича, ракеталарнинг аксарияти уриб туширилган бўлса-да, фуқаролик инфратузилмасига зарар етган.

Дастлаб уч киши жароҳатлангани ҳақида хабар берилган. Кейинчалик, Шуваев Белгород округидаги Беловское қишлоғида бир нафар тинч аҳоли вакили ҳалок бўлганини маълум қилган. Шунингдек, Белгород шаҳридаги инфратузилма объектларидан бирида ёнғин юзага келган. Қайси объект зарба остида қолгани очиқланмаган.

Эслатиб ўтамиз, 6 июль куни Украина Россиянинг энг йирик нефтни қайта ишлаш заводларидан бири Омскка зарба берган эди.