Украина Қора денгизда Туркия кемасига зарба берди (видео)

Кеча, 3 август куни Украина Қора денгизда Россиянинг Новороссийск портига йўл олган Туркиянинг юк кемасига ҳужум уюштирди. Бу ҳақда “Cumhuriyet“ хабар берди.

Маълум қилинишича, Туркиядан Россияга янги узилган мева ва сабзавотлар олиб кетаётган “Надежда Ро-Ро” кемасига учувчисиз учиш аппаратлари ҳужум қилган. Оқибатда кемада ёнғин юзага келган.

Ҳодиса оқибатида экипажнинг тўрт аъзоси жароҳат олган. Улардан уч нафари Туркия фуқароси экани айтилмоқда. Хабарга кўра, кема Туркиянинг Самсун портидан Новороссийск томон ҳаракатланаётган бўлган. Ҳужум Новороссийскдан тахминан 56 километр узоқликда содир бўлган.

Кема капитани Ялчин Шаҳин ҳужум Украина томонидан амалга оширилганини даъво қилиб, унда 6-7 та дрон ишлатилганини айтган. Шаҳин улар ёрдам кутаётганини, ҳамма хавфсиз эканлигини, аммо жароҳатланганлар борлигини қўшимча қилган.

Кема экипажи ҳужумдан кейин бошланган ёнғинни ўчиришга уринаётган бир пайтда, Россия денгиз флоти ҳудудда дронлар туфайли ёрдам кўрсатиш учун кемага яқинлашишда қийналгани хабар қилинган.

Кейинчалик, Денгиз ишлари бош бошқармаси Россия қирғоқлари яқинида “Надежда Ро-Ро” кемасига дрон ҳужуми оқибатида жароҳат олган 11 экипаж аъзоси Россия шифохонасида даволанаётганини, қолган экипаж аъзолари эса меҳмонхонага жойлаштирилганини маълум қилган.

Эслатиб ўтамиз, аввалроқ Россия ҳарбийлари Қора денгизда Украинанинг Одесса соҳиллари яқинида халқаро юк кемасига зарба бериши оқибатида камида 5 нафар экипаж аъзоси ҳалок бўлган эди.