Украина қарши ҳужумда керакли натижага эриша олмади – Зеленский

Украина Президенти Владимир Зеленский ёзги қарши ҳужум пайтида мамлакат Қуролли Кучлари кутилган муваффақиятларга эришолмаганини айтди. Бу ҳақда у “Associated Press” агентлигига берган интервьюсида сўз очди.

“Биз тезроқ натижага эришмоқчи эдик. Аммо воқеалар ривожи биз ўйлагандек ривожланмади”, деган Зеленский.

Шунингдек, Президент Украина Қуролли Кучлари “дунёнинг иккинчи армияси” билан курашаётганини, шунга қарамасдан чекинмаётганини қўшимча қилган.

“Қаранг, биз чекинмаяпмиз, бундан хурсандман. Биз дунёдаги иккинчи армия билан жанг қиляпмиз. Бизга сўраган барча қуролларни беришмади, лекин бундан шикоят ҳам қилмоқчи эмасмиз”, дейди Президент.

Унинг сўзларига кўра, Украина Қуролли Кучларига қўйилган чекловлар тезкор ҳужумга имкон бермайди.

“Биринчидан, ўйланган муваффақиятга эришиш учун куч етарли эмас. Биз имконимиз борича курашяпмиз”, деган Зеленский.

Шунингдек, у Исроил-Фаластин можароси Украинага ёрдам етказиб берилишига таъсир қилганини ҳам яширмаган.

Унинг айтишича, ҳозирда Украинанинг устувор йўналиши ўз қуролларини ишлаб чиқариш бўлиши керак. Бундан ташқари, Зеленский нима учун Ғарб кредитлари ва шартномаларини олишни хоҳлашини тушунтирган.

“Бу чиқиш йўли. Бизга бу имкониятларни беринг ва биз [қурол ишлаб чиқарувчи заводлар] қурамиз. Қандай куч ва вақт керак бўлмасин, биз буни жуда тез амалга оширамиз”, дея таъкидлаган Украина раҳбари.

Унинг фикрича, Россияни ҳарбий жиҳатдан ўзини-ўзи таъминлайдиган Украинадан бошқа ҳеч нарса қўрқитмайди.

Эслатиб ўтамиз, олдинроқ Владимир Зеленский Ғарб давлатлари Украинани қўллаб-қувватлашни тўхтатса, мамлакат қуролли кучлари чекинишга мажбур бўлишини айтганди.